Ճապոնական Կումամոտոյի պրեֆեկտուրայում գրեթե 64 հազար մարդու խորհուրդ է տրվել տարհանվել սողանքների պատճառով, հայտնում է NHK հեռուստաընկերությունը:
Պրեֆեկտուրայում, որտեղ ապրիլին 7 եւ 6 մագնիտուդով ուժեղ երկրաշարժերի շարք է տեղի ունեցել եւ հողը տեղախախտվել է ստորգետնյա ցնցումների պատճառով, հունիսի կեսից շարունակական հորդառատ անձրեւներ են տեղում:
Երկուշաբթի հորդառատ անձրեւների առաջացրած սողանքի պատճառով Կումամոտոյում վեց մարդ է զոհվել: Օդերեւութաբանները ռեկորդային են կոչել երկուշաբթի եւ երեքշաբթի այստեղ տեղացած տեղումների մակարդակը` ժամում մինչեւ 150 մմ: Նման ինտենսիվ անձրեւներ կարելի է դիտարկել ընդամենը մի քանի տարին մեկ անգամ:
Հեռուստաալիքը հաղորդում է, որ Կյուսյու կղզում, որտեղ Կումամոտոն է, մի շարք շրջաններում 400-ից 700 մմ տեղումներ են եղել: Բարձրացել է գետերի մակարդակը, մեծացել է սողանքների վտանգը:
Ինտենսիվ անձրեւներ են գալիս նաեւ Ճապոնիայի հյուսիսում` Հոկայդո կղզում: Մինչեւ կիրակի առավոտ այդտեղ կարող է մինչեւ 120 մմ տեղում գալ: Օդերեւութաբանները զգուշության կոչ են անում ջրհեղեղների եւ սողանքների աճող սպառնալիքի հետ կապված: