Շոտլանդիայի վարչապետ Նիկոլա Սթերջենը հայտարարել է, որ իր երկրի իշխանությունները կարող են վետո դնել ԵՄ-ից Մեծ Բրիտանիայի դուրս գալու որոշման վրա: Այս մասին նա հայտնել է BBC-ին տված հացրազրույցում:
Մեծ Բրիտանիայում հունիսի 23-ին տեղի է ունեցել ԵՄ կազմից Մեծ Բրիտանիայի դուրս գալու հարցով հանրաքվե: Պաշտոնական տվյալներով, ԵՄ կազմից դուրս գալու օգտին քվեարկել է բնակչության 51,9 տոկոսը:
Միաժամանակ Շոտլանդիայում Brexit-ի օգտին քվեարկել է հարցվածների 38 տոկոսը միայն, 62 տոկոսը դեմ է արտահայտվել:
Սթերջենն ասել է, որ եթե Բրիտանիայի կառավարությունը Շոտլանդիայի իշխանության առջեւ ԵՄ կազմից դուրս գալու հարց դնի (նման սցենարը հավանական է, նշում են փորձագետները), ինքն, իհարկե, կխնդրի Շոտլանդիայի խորհրդարանի անդամներին «օրենսդրական թույլտվություն» չտալ ԵՄ կազմից դուրս գալու համար: Նա հիշեցրել է, որ խորհրդարանի 129 տեղերից 63-ում իր կուսակցության ներկայացուցիչներն են:
Միաժամանակ, Սթերջենը հավելել է, որ դեռեւս պետք է տեսնել, թե ինչպես կզարգանան իրադարձությունները եւ ինչի կհանգեցնեն բանակցությունները Շոտլանդիայի եւ Բրիտանիայի միջեւ, Բրիտանիայի եւ Բրյուսելի, ինչպես նաեւ Շոտլանդիայի եւ Բրյուսելի միջեւ:
