Մի կողմից Ալիեւը շանտաժ է անում, մյուս կողմից նա չունի պատկերացում խաղաղ բանակցությունների մասին, նրա ոչ վարքագիծը, ոչ էլ ձեռագիրը չեն փոխելու։ Այս մասին NEWS.am-ի հետ զրույցում ասաց ԱԺ պատգամավոր Թեւան Պողոսյանն՝ անդրադառնալով Ալիեւի այն հայտարարությանը, որ Ադրբեջանը շարունակում է զենք գնել, արդիանականացնել բանակը եւ կախված չէ մեկ աղբյուրից։
«Մի քանի տարի առաջ էլ նույն միտքն եմ ասել՝ Մինսկի խմբի համանախագահները պետք է նախաձեռնությամբ հանդես գան ՄԱԿ–ում եւ սանկցիաների մեխանիզմ կիրառեն այն երկրի նկատմամբ, որը զենք կվաճառի Ադրբեջանին։ Դա Ադրբեջանի վարքագիծն է եւ որեւէ իմաստով զարմանք չի հարուցում, ոչ էլ երբեւեէ նա մտածելու է խաղաղ կարգավորման շուրջ ու դադարելու է զենք զինամթերք գնել»,–ասաց Թեւան Պողոսյանը։
Հարցին, թե եթե Ադրբեջանը շարունակում է զինվել ու ռազմատենչ հայտարարություններ անել, արդյոք չպե՞տք է հայկական կողմն էլ դրան դիմակայելու համար լծվի բանակը արդիականացնելու գործին, պատգամավորը պատասխանեց. «Երբ որ մենք շատ լավ գիտենք այդ ձեռագիրը, որ Ադրբեջանը մտածում է խնդիրը զենքով լուծելու ուղղությամբ, խաղաղությունը պետք է պարտադրենք ինքներս, ոչ ոք մեր փոխարեն դա չի անելու։ Պետք է բանակը արդիականացնենք՝ զարկ տալով տնտեսությանը, արդյունաբերության զարգացմանը։ Ուժեղացնենք ժողովրդավարական ինստիտուտները, որպեսզի կարողանանք մարտունակ բանակ պահել։ Եթե ունենանք Ադրբեջանից մարտունակ բանակ, կլինի խաղաղություն, եթե ոչ, ուրեմն միշտ Ադրբեջանը շարունակելու է զինվել ռազմական միջոցներով եւ հայտարարել՝ ունենք միջոցներ եւ կարող ենք դրանք սպառել։ Սա գիտակցելով՝ պետք է հասկանանք, որ Ադրբեջանը կարող է կրկնել ավանտյուրան, ինչը տեղի ունեցավ ապրիլին։ Իր համար էական չեն կորուստները, առաջնագծից 20 կմ խորությամբ բնակավայրեր չունի, բնակչությանը տարհանել է առաջնագծի տարածքից եւ իրեն էլ ոչինչ չի հետաքրքրում։ Շատ լավ հասկանում է, որ ավանտյուրան կրկնելով՝ վնաս է պատճառում հայ ժողովրդին»։