Հռոմի պապ Ֆրանցիսկոսը հայտնել է, որ քրիստոնյաները ու Հռոմի կաթոլիկ եկեղեցին պետք է ներում խնդրեն նույնասեռականներից՝ սեռական փոքրամասնոււթյունների հանդեպ նախկինում իրենց ունեցած վերաբերմունքի համար, հայտնում է «Ռոյթերը»:
Քահանայապետը հայտնել է, որ նույնասեռականները չպետք է խտրականության ենթարկվեն, նրանց հարգել է պետք: Ֆրանցիսկոսը մի քիչ ձեւափոխել է «Ով եմ ես, որ դատեմ» հանրահայտ խոսքը, որը նա ասել էր 2013-ին Հռոմի պապ կարգադրվելուց հետո:
«Եթե դա մարդու վիճակն է, բայց նա բարի կամք ունի ու փնտրում է Աստծուն՝ ո՞վ ենք մենք, որ դատենք»,- ասել է Պապը:
Ավելի ուշ Վատիկանի ներկայացուցիչ Ֆեդերիկո Լոմբարդին պարզաբանել է, որ խոսելով «վիճակի» մասին, Հռոմի պապը նկատի չուներ մարդու բժշկական վիճակը, այլ նկատի ուներ իրավիճակը, քանի որ իտալերենում այդ երկու բառերը հոմանիշներ են:
«Մենք պետք է ներողություն խնդրենք շատ բանի համար, ոչ միայն գեյերից: Բայց մենք պետք է ոչ թե պարզապես ներողություն, այլ ներում խնդրենք: Ներում: Աստած իմ, սա այն բառն է որը մենք այնքան հաճախ ենք մոռանում»- հավելել է Լոմբարդին:
Հռոմի կաթոլիկ եկեղեցու կարծիքով նույնասեռական միտումները մեղք չեն, սակայն նույնասեռական ակտերը գնահատվում են որպես մեղք:
