Պակիստանցի հոգեւորականները հունիսի 26-ին ֆեթվա են հրապարակել, որը թույլատրում է ամուսնություն կնքել տրանսգենդերների հետ, հայտնում է Dawn–ը։
Ֆեթվան, որը հասարակական–քաղաքական հարցերին վերաբերող նորմ է, եւ որի կատարումը պարտադիր բնույթ չի կրում, հավանություն է ստացել 50 հոգեւորականների կողմից, որոնք պատկանում են Թանզիմ Իթթիհադ ի Ումմա կրոնական համայնքին։
Ֆեթվայի հեղինակների կարծիքով՝ վիզուալ արտահայտված արական նշաններ ունեցող տրանսգենդերը կարող է ամուսնանալ կնոջ կամ այլ տրանսգենդերի հետ, որն արտաքնապես արտահայտված իգական նշաններ ունի եւ հակառակը։ Ընդ որում, երկու սեռերի արտաքին նշաններ ունեցող տրանսգենդերների համար արգելված է որեւէ մեկի հետ ամուսնանալը։
Ֆեթվայում նշվում է, որ նրանց չի կարելի զրկել ժառանգությունից, իսկ ծնողները, որոնք մերժում են այդ իրավունքը, առաջ են բերում աստծու զայրույթը։
Բացի այդ, հոգեւորականները մեղք են համարում տրանսգենդերներին ստորացնող, վիրավորող կամ ծաղրող ցանկացած գործողություն։
