Վրաստանի պաշտպանության նախարար Թինաթին Խիդաշելին հրաման է ստորագրել, որի համաձայն, Վրաստանի Զինված ուժերում ծառայությունը պարտադիր չի լինի:
«Իմ խոստումներից մեկն էր պարտադիր զորակոչի վերացումը… Բոլորն առանց այն էլ պետք է ցանկանան ծառայել Վրաստանի զինված ուժերում, որովհետեւ արժանի են: Իսկ ով չի ցանկանում, մենք բռնի չենք պարտադրի: Ես ձեր ներկայությամբ հրաման եմ ստորագրում այն մասին, որ այսուհետ պարտադիր զորակոչ չի լինելու», — Խիդաշելիի խոսքերն է մեջբերում «Փիրվելի ռադիո» ռադիոկայանը:
Վրաստանի պաշտպանական գերատեսչության ղեկավարն այս հրամանը ստորագրել է ԶԼՄ-ների ներկայացուցիչների հետ հանդիպմանը, որով նա ամփոփում է գերատեսչությունում տարվա իր աշխատանքը եւ խոսում է ՆԱՏՕ-ի Վարշավյան գագաթնաժողովի հեռանկարների մասին, որը կընթանա հուլիսի 8-9-ին:
Արժե նշել, որ դեռեւս ընթացիկ տարվա ապրիլին Թինաթին Խիդաշելին հայտնել էր զորակոչը չեղյալ հայտարարելու պատրաստակամության մասին, սակայն տվյալ որոշման ընդունումը նախատեսված էր 2017 թվականին:
Այսօրվա դրությամբ Վրաստանում զինվորական ծառայությունը չորս կարգի է բաժանվում` պարտադիր, պայմանագրային, կադրային եւ պահեստային:
Վրաստանում պարտադիր զինվորական ծառայության են զորակոչում երկրի 18-ից 27 տարեկան քաղաքացիներին: Զորակոչիկներին, պաշտպանության նախարարությունից բացի, բաշխում են նաեւ ուժային այլ գերատեսչություններում` Ներքին գործերի նախարարությունում, Պետանվտանգության ծառայությունում, Պատիժների եւ փորձարկման անցկացման նախարարությունում, ինչպես նաեւ պետական պահպանության հատուկ ծառայությունում:
Վրաստանում պարտադիր զինվորական ծառայության ժամկետը 12 ամիս է: Վրաստանում տարեկան երկու զորակոչ է լինում` աշնանը եւ գարնանը` հայտնում է «Սպուտնիկ-Գրուզիան»:
