Ստրասբուրգում հունիսի 25-ի հանդիպման ժամանակ Վենետիկի հանձնաժողովը առաջարկել է քվեարկված ցուցակները վստահված անձանց տրամադրել 30 րոպեով: Այս մասին NEWS.am-ի հետ զրույցում ասաց Ընտրական օրենսգրքի համահեղինակ, ՀՀ կառավարության աշխատակազմի ղեկավար-նախարար Դավիթ Հարությունյանը:
«Առաջարկություններ կային, որոնց վերաբերյալ քննարկում եղավ, որոնց մի մասը ընդունեցինք, այսօր խորհրդարանում կներկայացնենք: Օրինակ, որ 20 րոպեն դառնալում է 30 րոպե»,-ասաց Դավիթ Հարությունյանը:
Հարությունյանը նշեց, որ միջազգային կառույցներից տրվող գումարից նորություն չկա: Հիշեցնենք, որ վերահսկողական մեխանիզմները իրագործելու համար պահանջվող 15 միլիոն դոլարից տրամադրվելու է 11 միլիոնը: 5 միլիոնի խնդիրը բաց է մնում:
Հարցին, թե եթե այս 5 միլիոնն ամեն դեպքում չհաջողվի ձեռք բերել, հնարավո՞ր է՝ մասամբ տեղադրվեն այդ մեխանիզմները, Դավիթ Հարությունյանը պատասխանեց. «Չեմ կարծում»:
Մեր դիտարկմանը, թե ստացվում է, որ 4+4+4 ձեւաչափով ձեռք բերված պայմանավորվածությունները կամ ամբողջությամբ պետք է կատարվեն, կամ ոչինչ չի կատարվելու, նա դրական պատասխան տվեց:
Հիշեցնենք, որ Դավիթ Հարությունյանը նախկինում պնդում էր, որ 20 րոպեն ամբողջությամբ բավարար է քվեարկված ցուցակները ուսումնասիրելու համար:
Նշենք, որ այսօր Ազգային ժողովի նիստում 4+4+4 ձեւաչափով քննարկումների արդյունքում ձեռք բերված փոփոխություններն ընդգրկվելու են Ընտրական օրենսգրքում: