Դաունինգ սթրիթում սկսվել է ԵՄ-ից Մեծ Բրիտանիայի դուրս գալու հարցով բրիտանական նախարարների խորհրդի նիստը, հայտնում է «ՌԻԱ Նովոստին»:
Քեմերոնը պնդում է, որ ԵՄ-ից դուրս գալը չպետք է լինի հապշտապ, դրա համար էլ անհրաժեշտ չի համարում շտապել ԵՄ-ից դուրս գալու վերաբերյալ տեղեկացնելու հարցում, սակայն ԵՄ ղեկավարությունը պնդում է, որ անորոշության ժամանակաշրջանը պետք է ավարտվի հնարավորինս շուտ ու Բրիտանիային «շուտափույթ ամուսնալուծության» կոչ է անում:
ԵՄ-ի մասին լիսաբոնյան պայմանագրի 50-րդ հոդվածը հայտնում է, որ ԵՄ ցանկացած անդամ պետություն կարող է որոշում կայացնել Միության կազմից դուրս գալու մասին: Երկիրը պետք է նախ այդ մասին պաշտոնապես տեղեկացնի Բրյուսելին, որից հետո սկսվում է միության կազմից դուրս գալու մասին բանակցությունների գործընթացը ՝ միության հետ ապագա փոխհարաբերությունները հաշվի առնելով: Համաձայնագրի՝ ուժի մեջ մտնելու օրվանից հետո կամ ԵՄ-ին տեղեկացնելուց հետո երկու տարվա ընթացքում դրա բացակայության դեպքում ԵՄ բոլոր պայմանագրերը այլեւս չեն տարածվում միությունից դուրս եկող պետության վրա: Ըստ այդ հոդվածի՝ ԵՄ-ից դուրս եկող անդամ պետությունները գագաթաժողովում ու ԵՄ խորհրդում չեն մասնակցում իրենց դուրս գալու վերաբերյալ որոշումների քննարկմանն ու կայացմանը:
50-րդ հոդվածը ԵՄ-ն լքած երկրի համար նախատեսում է միությանն անդամակցության համար նորից դիմելու հնարավորություն: Նման պետությունը պետք է ԵՄ-ին անդամակցության հայտ ներկայացնի նույն պայմաններով, ինչ մյուս հավակնորդ պետությունները:
Հիշեցնենք, որ հունիսի 23-ին բրիտանացիների 51.9 տոկոսը քվեարկել է ԵՄ կազմից երկրի դուրս գալու օգտին, որից հետո վարչապետ Դեւիդ Քեմերոնը հայտարարել է հրաժարական տալու մասին: Ենթադրվում է, որ Կոնսերվատիվ կուսակցության նոր առաջնորդի անունը հայտնի կդառնա հոկտեմբերին՝ կուսակցության համաժողովի ժամանակ: Քեմերոնի կառավարության առնվազն երկու անդամ դիտարկում են իրենց թեկնածությունն առաջադրելու հնարավորությունը՝ Ֆինանսների նախարար Ջորջ Օսբորնը ու ՆԳՆ ղեկավար Թերեզա Մեյը: Նրանց գլխավոր մրցակիցը կարող է դառնալ Լոնդոնի նախկին քաղաքապետ Բորիս Ջոնսոնը, որը ղեկավարում էր ԵՄ-ից դուրս գալու քարոզչությունը: