Ազգային ժողովի ՀԱԿ խմբակցության պատգամավոր Նիկոլ Փաշինյանին հետաքրքրում է՝ եթե Եվրամիությունը 2 մլն եվրո ավելի տա, Ընտրական օրենսգրքի վերջում կարո՞ղ ենք գրել՝ «Շնորհավոր Ամանոր եւ Սուրբ Ծնունդ»:
«Ասում եք՝ ըսենց կանենք, ընենց կանենք, բայց եթե դոնոր կազմակերպությունները փողը տան: Այսինքն, եթե չտան, վստահությունը չենք բարձրացնի, ժողովրդավարական ընտրություններ մեզ պետք չեն: Ձեր ասածից մի պրոզայիկ հարց է բխում՝ եթե Եվրամիությունը 2 մլն ավել տա, կարա՞նք օրենքի վերջում գրել՝ շնորհավոր Ամանոր եւ Սուրբ Ծնունդ»,- այսօր՝ հունիսի 27-ին, Ընտրական օրենսգրքի փոփոխությունների մասին նախագծի քննարկման ժամանակ ասաց Փաշինյանը՝ դիմելով հիմնական զեկուցող Դավիթ Հարությունյանին:
Կառավարության աշխատակազմի ղեկավար- նախարարը հորդորեց Նիկոլ Փաշինյանին իր անձնական օրինակի վրա գրել դա, իսկ 2 մլն էլ՝ պահել իրեն:
Նշենք, որ Ընտրական օրենսգրքում փոփոխվում են այն դրույթները, որոնց վերաբերյալ ՀԱԿ-ը պահանջներ էր ներկայացրել իշխանությանը։ Հունիսի կեսերին վերսկսված 4+4+4 ձեւաչափով քննարկման ժամանակ իշխանությունը ներկայացրել էր կատարված փոփոխությունները։ Ըստ դրանց՝ ՀԱԿ-ի հինգ պահանջներից 4-ը ընդունվել էր, ինչի շուրջ կողմերը եկել են կոնսենսուսի։ Ըստ ձեւակերպման՝ ոչ թե Ընտրական օրենսգրքի շուրջ են կողմերը եկել կոնսենսուսի, այլ վերահսկողական մեխանիզմների։ Նախկինում հայտարարվել էր, որ եթե կողմերը այս փոփոխությունների շուրջ կոնսենսուսի գան, արտահերթ նիստով դրանք ընդգրկվելու են Ընտրական օրենսգրքում։
Հիշեցնենք, որ այս կոնսենսուսը միտված էր միջազգային կառույցներից վերահսկողական մեխանիզմների գործադրման համար ֆինանսական աջակցություն ստանալուն։ Սակայն հիմա պարզվում է՝ նախկինում շրջանառված 15 միլիոն դոլարից 10 միլիոնն են տրամադրելու, իսկ իշխանությունը չի պատրաստվում բացը լրացնել։