Ալիեւը իր ամպլուայի մեջ էր, նրա հայտարարությունները լի էին պատմական անճշտություններով եւ սուտ տեղեկություններով: Այդ մասին այսօր՝ հունիսի 27-ին, ԱԺ-ում լրագրողների հետ ճեպազրույցում հայտարարեց ԱԺ փոխնախագահ Էդուարդ Շարմազանովը՝ անդրադառնալով Ադրբեջանի նախագահի այն հայտարարությանը, թե չի կարծում, որ պետք է վստահության մեխանիզմներ կիրառվեն:
«Երբ ասում է՝ «պատմական ադրբեջանական հողեր» դա որն է: Ադրբեջանն ընդամենը 98 տարվա պատմություն ունի: Հինգ անգամ նույն անհեթեթությունն ասելով` արժեքը չի ավելանում, դու ավելի անհեթեթ ես երևում մարդկանց աչքերում: Նա նաեւ նշել է, որ չի կարծում, որ պետք է վստահության մեխանիզմներ կիրառվեն: Սա բացահայտ հետքայլ է այն պայմանավորվածություններից, որ ձեռք են բերվել Վիեննայում ԵԱՀԿ Մինսկի խմբի համանախագահ երկրների ԱԳ նախարարների հետ»,-ասել է Շարմազանովը:
Նրա խոսքով, Սանկտ Պետերբուրգում Սարգսյան-Պուտին-Ալիեւ հանդիպման ժամանակ բոլոր կողմերը նշել են, որ Սանկտ Պետերբուրգի հանդիպումը Վիեննայի հանդիպման շարունակությունն է:
«Հիշեցնում եմ հատկապես ադրբեջանական կողմին՝ Վիեննայի փաստաթղթում հայտարարության մեջ սեւով սպիտակի վրա գրված է վստահության մեխանիզմների իրականացման անհրաժեշտության մասին»,-ասաց նա:
Դիտարկմանը, որ այդ մասին նշված էր Պետերբուրգում ընդունված հայտարարությունում, Շարմազանովն արձագանքեց. «Եթե գրված է որ դա Վիեննայի տրամաբանական շարունակությունն է, ուրեմն պետք է տրամաբանական շարունակել այն պայմանավորվածությունները, որոնք ձեռք են բերվել: Այստեղ Մինսկի խմբի համանախագահները պետք է իրենց դիրքորոշումը ցույց տան Ալիեւի նման հետքայլի եւ մերժողական մոտեցման հետ կապված»:
Ինչ վերաբերում է Ալիեւի հայտարարությանը՝ հիմնախնդրի լուծման փուլային տարբերակի անհրաժեշտության վերաբերյալ, Շարմազանովն ասաց. «Լեռնային Ղարաբաղը ոչ մի ձեւ եւ ոչ մի կարգավիճակով չի կարող ընդգրկվել Ադրբեջանի կազմում։ Լեռնային Ղարաբաղ ինքնավար մարզը երբեք չի եղել անկախ Ադրբեջանի կազմում: Դա բլեֆ է, որն անում է Ալիեւը։ ԼՂԻՄ ժողովուրդը 88 թվականին սկսել է իր պայքարն անկախության համար ու մենք ամեն ինչ անելու ենք, որ այդ ինքնորոշման պայքարը ավարտվի հաղթանակով, իսկ հաղթանակը ԼՂ ժողովրդի պարտադիր կամարտահայտության իրականացումն է, որի արդյունքում ԼՂ ժողովուրդը ինքը կորոշի իր ճակատագիրը»:
