Շիրակի մարզի Արթիկ քաղաքում հունիսի 24-ին սելավների հետեւանքները վերացնելու աշխատանքներ են կատարվում: Արթիկի քաղաքապետ Արսեն Աբրահամյանը NEWS.am-ի հետ զրույցում ասաց, որ այս պահին մաքրում են սոցիալական նշանակություն ունեցող օբյեկտներ տանող ճանապարհները:
«Դպրոցին հարակից տարածքն է մաքրվում, ծննդատան, կարեւոր խաչմերուկներն են մաքրվում, հիվանդանոց տանող ճանապարհը»,- ասաց քաղաքապետը:
Քաղաքապետը նշեց, որ միաժամանակ հաշվում են քաղաքին հասցված վնասների չափը եւ թե քանի տնտեսություն է տուժել:
Հիշեցնենք, որ հունիսի 24-ին վարարել էր Ղարանղու գետը, խոշոր գլաքարերի կուտակումներ էին առաջացել Մովրովի եւ Բմբուլենց սելավատարերում, ինչի հետեւանքով ջրալցվել էին Արթիկի փողոցները:
Ջրալցվել էր նաեւ Արթիկի թիվ 2 մանկապարտեզը, որտեղից փրկարարները դուրս էին բերել 70 երեխայի եւ 27 աշխատակցի, որոնց տեղափոխել էին անվտանգ տարածք, իսկ ջրալցված 13 շենք շինություններից՝ 60 բնակչի, որոնք տեղափոխվել էին հարազատների բնակարաններ:
