Հայաստանում էլեկտրամատակարարման ոլորտում անթափանցիկ գործունեության պատճառով ժողովուրդը չի հավատում, որ սակագինը 2.58 դրամից ավելի շատ իջեցնելու հնարավորություն չկար։ Այս մասին հունիսի 27-ին կայացած մամուլի ասուլիսին ասել է տնտեսագետ Վարդան Բոստանջյանը։
Նրա խոսքով՝ ներկայումս էլեկտրաէներգիան 7 դրամով թանկանալուց հետո իրավիճակն ասես թե չի փոխվել, քանի որ արտադրողները, փոխադրողները եւ ՀԾԿՀ–ն նշել են, որ սակագինը 2.58 դրամից ավելի շատ իջեցնելու հնարավորություն չկա։ «Ամեն դեպքում, քանի որ այդ ոլորտում տարիներ շարունակ անթափանցիկ գործունեություն է իրականացվել, մենք ուղղակի չենք հավատում, որ գինն իջեցնելու հնարավորություն այլեւս չկա։ Մեր քաղաքացիները կարող են կրել ամեն տեսակի, անգամ ամենամեծ զրկանքները, միայն եթե մենք օբյեկտիվ դժվարություններ ունենք։ Բայց ես չեմ կարծում, որ հիմա մենք օբյեկտիվ դժվարությունների առաջ ենք կանգնած»,– ընդգծել է Վարդան Բոստանջյանը։
Օգոստոսի 1-ից Հայաստանում էլեկտրաէներգիայի սակագինը 48.78 դրամից կդառնա 46.2 դրամ։