Ադրբեջանի նախագահի հայտարարությունն ընդամենը իր ցանկությունն է: Այս մասին այսօր` հունիսի 27-ին, Ազգային ժողովում լրագրողների հետ զրույցում ասել է ՀՅԴ խմբակցության ղեկավար Արմեն Ռուստամյանը՝ անդրադառնալով Ադրբեջանի նախագահ Իլհամ Ալիեւի հայտարարությանը, թե չի կարծում, որ պետք է վստահության մեխանիզմներ կիրառվեն:
«Եթե դրա մասին խոսվեր, այլ ոչ թե այն, ինչ խոսվել է բանակցությունների ժամանակ, դա կհրապարակվեր: Սրանից արդեն բխում է, որ պարոն Ալիեւի համար երեւի ոչ ձեռնտու ընթացք է ստացել բանակցությունը, սա երեւում է իր մի քանի արտահայտությունից»,-ասաց Արմեն Ռուստամյանը:
Ըստ Ռուստամյանի` պարզ երեւում է, որ Ալիեւին ձեռնտու չէ շփման գծի երկայնքով հետաքննության մեխանիզմներ ամրագրվեն, Ալիեւը պատրաստվում է հետագայում նորից խախտել հրադադարը եւ չի ուզում, որ դա արձանագրվի միջազգային կառույցերի կողմից:
«Ալեւը նորից չի հասկացել, որ քանի դեռ Ղարաբաղի անկախ կարգավիճակը չի լուծվում, անիմաստ է խոսել որեւէ զիջման, փոխզիջման մասին: Հիմա ինքը վերադարձել է Բաքու եւ նման հայտարարություններ է անում: Առաջին անգամը չէ, որ ականատես ենք լինում` բանակցային սեղանի շուրջ մի գործընթաց է լինում, վերադառնալուց հետո Ադրբեջանը փորձում է վերականգնել իր նախկին դիրքորոշումը: Վստահ եմ, որ դա անում է իր ներքին սպառման համար»,- նշեց Ռուստամյանը: Ըստ դաշնակցական պատգամավորի` Ադրբեջանը երկակի խաղ է խաղում, մի կողմից իբրեւ բանակցում է, մյուս կողմից պատերազմի է պատրաստվում: