Հայ-ամերիկյան աշխատանքային խմբի շրջանակում երկու կողմերը իրական հաջողություններ են գրանցել էներգետիկայի, հանքարդյունաբերության եւ տուրիզմի ոլորտներում Այսօր Երեւանում կայացել է հայ–ամերիկյան տնտեսական համագործակցության միջկառավարական հանձնաժողովի միջնաժամկետ հանդիպումը ՀՀ փոխվարչապետ, միջազգային տնտեսական ինտեգրման եւ բարեփոխումների նախարար, հանձնաժողովի հայկական մասի համանախագահ Վաչե Գաբրիելյանի եւ ԱՄՆ փոխպետքարտուղարի Եվրոպայի ու Եվրասիայի հարցերով տեղակալ, հանձնաժողովի ամերիկյան մասի համանախագահ Բրիջիթ Բրինքի գլխավորությամբ:
Կողմերը գոհունակությամբ արձանագրել են միջկառավարական հանձնաժողովի գործունեության առաջընթացը՝ միտված համատեղ փոխգործակցության խորացմանը: Ողջունելով հանձնաժողովի ամերիկյան մասի համանախագահ Բրիջիթ Բրինքին ՀՀ կառավարությունում, փոխվարչապետ Վաչե Գաբրիելյանը նշել է, որ երկու կողմերը ակտիվ աշխատանքներ են տարել ֆինանսական, Հայաստանի էներգետիկ ոլորտի դիվերսիֆիկացման, քաղաքացիական ավիացիայի ոլորտում բարեփոխումների («բաց երկնքի» քաղաքականության), արդյունահանող ճյուղերի թափանցիկության նախաձեռնությանը Հայաստանի նախատեսվող անդամակցության, ինչպես նաեւ կոռուպցիայի դեմ պայքարի հարցերում:
ԱՄՆ փոխպետքարտուղարի Եվրոպայի ու Եվրասիայի հարցերով տեղակալ Բրիջիթ Բրինքը նշել է, որ տնտեսական համագործակցության հարցերով հայ-ամերիկյան աշխատանքային խումբը շարունակում է մնալ որպես կարեւոր հարթակ փոխադարձ հետաքրքրության մի շարք հարցերի շուրջ աշխատելու համար: Ինչպես նշել է Բրիջիթ Բրինքը՝ իր գործընկեր, ՀՀ փոխվարչապետԳաբրիելյանի հետ համագործակցության շրջանակում իր ուշադրությունը բեւեռված է տնտեսական կապերի խորացման ուղիների վերհանմանը, ԱՄՆ աջակցության հասցեականությանը, հետագա երկկողմ առեւտրին ու ներդրումներին եւ շուկայական բարեփոխումների խորացմանը Հայաստանում: Հայ-ամերիկյան աշխատանքային խմբի շրջանակում երկու կողմերը իրական հաջողություններ են գրանցել էներգետիկայի, հանքարդյունաբերության եւ տուրիզմի ոլորտներում: Ի լրումն դրա, նաեւ մեծ ուշադրություն է դարձվում կոռուպցիայի դեմ պայքարում ՀՀ կառավարության ընթացիկ ջանքերին: Հիշեցնենք, որ հայ – ամերիկյան տնտեսական համագործակցության միջկառավարական հանձնաժողովի նախորդ նիստը կայացել է Երեւանում, 2015 թվականի նոյեմբեր ամսին:
Կողմերը պայմանավորվեցին միջկառավարական հանձնաժողովի հաջորդ նիստն անցկացնել այս տարվա վերջին, ԱՄՆ Վաշինգտոն քաղաքում:
