Ադրբեջանական կողմի համար այնքան էլ հեշտ չի լինի խափանել միջազգային հանրության ջանքերը ղարաբաղյան հակամարտության շփման գծում միջադեպերի հետաքննության մեխանիզմների ներդրման ուղղությամբ: Այդ մասին NEWS.am-ի թղթակցի հետ զրույցում հայտնել է Լեռնային Ղարաբաղի Հանրապետության նախագահի մամուլի քարտուղար Դավիթ Բաբայանը:
Անդրադառնալով Ադրբեջանի նախագահ Իլհամ Ալիեւի վերջին հայտարարությանը նշված մեխանիզմների հաստատման անհրաժեշտության բացակայության մասին, նա նշել է. «Մենք նախատեսել էինք դեպքերի նման զարգացում` միշտ ընդգծելով, որ Ադրբեջանն ամեն հնարավորը կանի բարդացնելու եւ խոչընդոտներ ստեղծելու միջադեպերի հետաքննության մեխանիզմների հաստատման գործընթացում: Իհարկե դժվար կլինի, բայց դրա հնարավորություն կա եւ ԵԱՀԿ-ի Մինսկի խմբի համանախագահները պետք է աշխատեն այդ ուղղությամբ, անհրաժեշտության դեպքում հասցեական հայտարարություններ անելով եւ Ադրբեջանի նկատմամբ համապատասխան քաղաքականություն իրականացնելով»:
Հիշեցնենք, որ Ադրբեջանի նախագահ Իլհամ Ալիեւը զինծառայողների համար շենքի բացմանը զինվորականների հետ հանդիպման ընթացքում մասնավորապես հայտնել էր. «Ինչ վերաբերում է հայերի կողմից որպես պայման առաջադրված միջադեպերի հետաքննության մեխանիզմի կիրառությանը, կարծում եմ, որ այս փուլում դրա անհրաժեշտություն չկա: Նախ` նման մեխանիզմներ չկան: Մեզ ոչ ոք կոնկրետ չի ասում, թե իրենցից ինչ են ներկայացնելու այդ մեխանիզմները: Նման դեպքում սխալ կլիներ այսօր քննարկել այդ հարցը: Երկրորդ` ո՞րն է դրա իմաստը: Եթե դրա տակ նկատի ունեն հակամարտության «սառեցում» եւ շփման գծում որոշ լրացուցիչ միջոցների ընդունում, Ադրբեջանն իհարկե դրան չի գնա»:
