Թուրքիայի նախագահ Ռեջեփ Թայյիփ Էրդողանը Վլադիմիր Պուտինին ուղղված իր ուղերձում ցավակցություն է հայտնել Սու-24 կործանիչի օդաչուի մահվան կապակցությամբ: Նամակի տեքստը հրապարակվել է Ռուսաստանի նախագահի կայքում:
Փաստաթղթում ասված է, որ Ռուսաստանը Թուրքիայի համար ընկեր է եւ ռազմավարական գործընկեր, որի հետ թուրքական իշխանությունները չէին ցանկանա փչացնել հարաբերությունները:
«Մենք երբեք ցանկություն եւ ակնհայտ նպատակ չենք ունեցել` խոցելու Ռուսաստանի Դաշնությանը պատկանող ինքնաթիռը», — ընդգծված է հաղորդագրության մեջ:
Էրդողանը նաեւ հայտնել է, որ թուրքական կողմը ռուս օդաչուի մարմինը վերցրել է սիրիացի ընդդիմադիրներից եւ այն Թուրքիա է տեղափոխել, որտեղ «ռուս-թուրքական հարաբերություններին վայել մակարդակում» անցկացվել են բոլոր նախահուղարկավորային պրոցեդուրաները:
«Ես ուզում եմ եւս մեկ անգամ իմ կարեկցանքը եւ խորը ցավակցությունը հայտնել ռուսաստանցի զոհված օդաչուի ընտանիքին եւ ասում եմ. ներողություն: Ամբողջ սրտով կիսում եմ նրանց ցավը: Ռուսաստանցի օդաչուի ընտանիքին մենք ընկալում ենք որպես թուրք ընտանիքի: Ցավը մեղմելու եւ հասցված վնասի ծանրությունը թեթեւացնելու համար մենք պատրաստ ենք ցանկացած նախաձեռնության», — ասված է ուղերձում:
Բացի այդ, տեքստում նշված է, որ Թուրքիայի քաղաքացու նկատմամբ, «որի անունը կապվում է ռուսաստանցի օդաչուի մահվան հետ», սկսվել է եւ վարվում է դատական հետաքննություն:
Մոսկվայի եւ Անկարայի հարաբերությունները վատացել էին 2015-ի նոյեմբերին, երբ թուրքական ՌՕՈՒ-ն Սիրիայի երկնքում ռուսական Սու-24 ինքնաթիռ էր խոցել, ինչպես նաեւ ինքնաթիռից թռած օդաչու Օլեգ Պեշկովի սպանությունից հետո: Թուրքական կողմը բազմիցս հայտնել է Ռուսաստանի հետ հարաբերությունները կարգավորելու ցանկության մասին, սակայն նախագահ Վլադիմիր Պուտինն ընդգծում էր, որ դա հնարավոր է այն բանից հետո միայն, երբ Անկարան ներողություն կխնդրի տեղի ունեցածի համար:
