Եթե Ադրբեջանը նախընտրում է փուլային տարբերակը, ապա թող ճանաչի Լեռնային Ղարաբաղի Հանրապետության անկախությունը, իսկ մյուս բոլոր հարցերը կքննարկվեն հետագայում: Այս մասին NEWS.am-ի թղթակցի հետ զրույցում հայտարարեց ԼՂՀ նախագահի մամուլի քարտուղար Դավիթ Բաբայանը:
Նրա խոսքով, Ադրբեջանը, ցավոք, չի հրաժարվել Ղարաբաղի հիմնախնդրի փուլային լուծման մոտեցումից: «Բայց հարց է առաջանում. եթե Ադրբեջանն իսկապես շահագրգռված է հակամարտության լուծմամբ, ինչո՞ւ է պնդում փուլային տարբերակի հարցում: Եթե ադրբեջանական կողմը փուլային տարբերակն է նախընտրում, այդ դեպքում թող ճանաչի ԼՂՀ անկախությունը եւ փուլային կարգավորման համար ճանապարհ բացի: Դա Ադրբեջանի կառուցողական մոտեցման վառ օրինակ կլինի»,- ընդգծեց Դավիթ Բաբայանը:
Բայց հայտարարությունը, որ Բաքուն ԼՂՀ անկախության ճանաչման հնարավորություն չի տեսնում, խոսում է այն մասին, որ Բաքվի քաղաքականություն ուղղված է Ադրբեջանի կողմից Լեռնային Ղարաբաղի փուլային կլանմանը: «Դա լուրջ չէ»,- փաստեց Դավիթ Բաբայանը:
Հիշեցնենք, որ զինծառայողների համար կառուցված շենքի բացման արարողության ժամանակ Ադրբեջանի նախագահ Իլհամ Ալիեւը կրկին ներկայացրել է խնդրի լուծման իր կտրուկ եւ ագրեսիվ տեսլականը:
