Թուրքիայի նախագահ Ռեջեփ Թայիփ Էրդողանի ներողությունը Ռուսաստանի հետ հարաբերությունները կարգավորելու հերթական փորձն է: Այս մասին NEWS.am-ի թղթակցի հետ զրույցում հայտարարեց Ռուսաստանի գիտությունների ակադեմիայի Համաշխարհային տնտեսության եւ միջազգային հարաբերությունների գիտաշխատող, քաղաքագետ, թուրքագետ Վիկտոր Նադեին-Ռաեւսկին:
Նրա խոսքով, թուրքական տնտեսությունն իսկապես տուժել է ռուսական պատժամիջոցների հետեւանքով: «Այս դեպքում դրանք բավական ցավոտ էին: Ներկայում Անթալիայում հարյուրավոր հյուրանոցներ են վաճառվում: Բացի այդ, մեծապես տուժել է Թուրքիայի շինարարական ոլորտը, քանի որ ստիպված էին հրաժարվել թուրքական կողմի համար շահավետ պատվերներից: Տուժեց նաեւ թեթեւ արդյունաբերությունը: Անկեղծ լինենք. հետխորհրդային տարիներին Թուրքիան Ռուսաստանի թեթեւ արդյունաբերական արտադրանքի հիմնական մատակարարն էր»,- նշեց Վիկտոր Նադեին-Ռաեւսկին: Բացի այդ, «Թուրքական հոսք» նախագիծը, որը սառեցվեց, Աքքույուի ԱԷԿ-ի շինարարությունը, որը նույնպես սառեցվեց:
Նա հիշեցրեց, որ թուրքերը, իհարկե, բազմիցս են փորձել երկխոսություն սկսել, բայց Ռուսաստանը ցանկություն չի հայտնել, քանի դեռ չեն կատարվել ռուսական կողմի պայմանները:
«Այսպիսով՝ քայլն արված է, Ռուսաստանի արձագանքից է կախված հարաբերությունների վերականգնման հնարավորությունը, բայց, իմ կարծիքով, Ռուսաստանի եւ Թուրքիայի բարեկամական հարաբերությունների լիարժեք վերականգնում մոտ ապագայում հազիվ թե տեղի ունենա»,- ամփոփեց թուրքագետը:
Ավելի վաղ Ռուսաստանի նախագահի մամուլի քարտուղար Դմիտրի Պեսկովը հայտարարել էր, որ Թուրքիայի նախագահ Էրդողանը նամակ է ուղարկել ՌԴ նախագահ Վլադիմիր Պուտինին, որում ներողություն է խնդրում ռուսական Սու-24 ռմբակոծիչը խոցելու համար: