Չեչնիայի ղեկավար Ռամզան Կադիրովը հույս է հայտնել, որ Թուրքիայի իշխանությունները պատասխանատվության կենթարկեն ռուսական Սու-24 օդանավի հետ կապված միջադեպի մեղավորներին եւ կփոխհատուցեն վնասը: Այս մասին գրում է ՌԻԱ Նովոստին:
«Մենք հույս ունենք, որ թուրքական կողմը կիրականացնի վնասը փոխհատուցելու, մեղավորներին պատասխանատվության ենթարկելու պատրաստակամության մասին հնչեցրած հայտարարությունը: Համոզված եմ, որ Ռուսաստանը երբեք նպատակ չի ունեցել առանց պատճառի խզել հարաբերությունները Թուրքիայի հետ»,- Instagram-ի իր էջում գրել է Կադիրովը:
Ավելի վաղ Ռուսաստանի նախագահի մամուլի քարտուղար Դմիտրի Պեսկովը հայտարարել էր, որ Թուրքիայի նախագահ Ռեջեփ Թայիփ Էրդողանը ՌԴ նախագահ Վլադիմիր Պուտինին նամակ է ուղարկել, որում խորապես ցավակցել է Սու-24 օդանավի զոհված օդաչուի ընտանիքին, ինչպես նաեւ ցանկացած նախաձեռնության պատրաստակամություն հայտնել՝ «հասցված վնասի ցավն ու ծանրությունը մեղմելու» համար: