Ազգային ժողովի ՀՀԿ խմբակցության պատգամավոր Հովհաննես Սահակյանի համար զարմանալի է, որ 4+4+4 ձեւաչափով ստորագրված համաձայնությունից հետո ընդդիմադիր գործիչները խորհրդարանում այլ բան են հայտարարում:
«Համաձայնության ստորագրման ժամանակ ասում էինք՝ շամպայններ պիտի պայթեցնենք, խմենք, միմյանց շնորհավորենք: Ես մեծ անկնալիք ունեի, որ նույն տրամադրություններով մենք նիստերի դահլիճում կքննարկենք Ընտրական օրենսգրքում փոփոխություններ անելու մասին նախագիծը: Բայց այդ տրամադրություններն ընդամենը մեկ գիշեր տեւեց, վատ երազ տեսաք, արթնացաք ի՞նչ եղավ, չգիտեմ, տրամադրությունները 180 աստիճանով փոխվեցին»,- այսօր՝ հունիսի 28-ին, խորհրդարանում ասաց Հովհաննես Սահակյանը՝ անդրադառնալով այն ընդդիմադիր գործիչներին, որոնք ստորագրելուց հետո այսօր արդեն քննադատում են բերված նախագիծը:
Ըստ ՀՀԿ-ական պատգամավորի, ստորագրումից հետո այսպես կոչված վստահության հիմնաքար պետք է ստեղծվեր, որի վրա կգրվեր բոլոր ստորագրածների անունները. «Նրանց անունը, ում չկա, մուրճով ու քլունգով քանդում են այդ վստահության հիմնաքարը, որ ուրիշների անունները չլինեն»: Նշենք, որ Ընտրական օրենսգրքում փոփոխվում են այն դրույթները, որոնց վերաբերյալ ՀԱԿ-ը պահանջներ էր ներկայացրել իշխանությանը։ Հունիսի կեսերին վերսկսված 4+4+4 ձեւաչափով քննարկման ժամանակ իշխանությունը ներկայացրել էր կատարված փոփոխությունները։ Ըստ դրանց՝ ՀԱԿ-ի հինգ պահանջներից 4-ը ընդունվել էր, ինչի շուրջ կողմերը եկել են կոնսենսուսի։ Ըստ ձեւակերպման՝ ոչ թե Ընտրական օրենսգրքի շուրջ են կողմերը եկել կոնսենսուսի, այլ վերահսկողական մեխանիզմների։ Նախկինում հայտարարվել էր, որ եթե կողմերը այս փոփոխությունների շուրջ կոնսենսուսի գան, արտահերթ նիստով դրանք ընդգրկվելու են Ընտրական օրենսգրքում։
Հիշեցնենք, որ այս կոնսենսուսը միտված էր միջազգային կառույցներից վերահսկողական մեխանիզմների գործադրման համար ֆինանսական աջակցություն ստանալուն։ Սակայն հիմա պարզվում է՝ նախկինում շրջանառված 16 միլիոն դոլարից 11 միլիոնն են տրամադրելու, իսկ իշխանությունը չի պատրաստվում բացը լրացնել։