Ընդդիմադիր քաղաքական ուժերի համար նախընտրական գործընթացն արդեն սկսվել է, սակայն եկեք մեր հասարակության համար տարօրինակ ու անհասկանալի չլինենք: Այս մասին այսօր՝ հունիսի 28-ին, Ազգային ժողովում Ընտրական օրենսգրքում փոփոխություններ եւ լրացումներ կատարելու մասին օրենքի նախագծի քննարկման ժամանակ ասաց խորհրդարանի փոխնախագահ Հերմինե Նաղդալյանը՝ դիմելով այն ընդդիմադիր գործիչներին, որոնք 4+4+4 ձեւաչափով ստորագրել են համաձայնության հայտարարության տակ, սակայն նիստերի դահլիճում շարունակում են քննադատել նախագիծը:
«Եկեք կողքից մեզ նայենք, մենք ոչ թե բովանդակային կողմն ենք քննարկում, այլ զրոյից ենք սկսում, մազոխիզմը մի քիչ էլ պակաս էր ասված, համեստ էր ասված. քան այս իրավիճակն է: Տպավորություն է, որ մենք չենք ուզում որեւէ հարց լուծել, այլ պարզապես ուզում ենք անվերջ խոսել: Հասկանում ենք, որ նախընտրական գործընթացը հատկապես ընդդիմադիր հատվածում ավելի շուտ է սկսվել ու դաժան տեմպով ընթանում է, բայց ձեր դրած ստորագրությանը հավատո՞ւմ եք, դո՞ւք եք դրել այդ ստորագրությունը, դուք գոնե հավատո՞ւմ եք ձեր ստորագրությանը: 5 հարցից 4-ում համաձայնության ենք եկել, հիմա ի՞նչ ենք այստեղ քննարկում»,- ասաց Հերմինե Նաղդալյանը՝ հորդորելով գործընկերներին կանխատեսելի լինել հասարակության համար:
Նշենք, որ Ընտրական օրենսգրքում փոփոխվում են այն դրույթները, որոնց վերաբերյալ ՀԱԿ-ը պահանջներ էր ներկայացրել իշխանությանը։ Հունիսի կեսերին վերսկսված 4+4+4 ձեւաչափով քննարկման ժամանակ իշխանությունը ներկայացրել էր կատարված փոփոխությունները։ Ըստ դրանց՝ ՀԱԿ-ի հինգ պահանջներից 4-ը ընդունվել էր, ինչի շուրջ կողմերը եկել են կոնսենսուսի։ Ըստ ձեւակերպման՝ ոչ թե Ընտրական օրենսգրքի շուրջ են կողմերը եկել կոնսենսուսի, այլ վերահսկողական մեխանիզմների։ Նախկինում հայտարարվել էր, որ եթե կողմերը այս փոփոխությունների շուրջ կոնսենսուսի գան, արտահերթ նիստով դրանք ընդգրկվելու են Ընտրական օրենսգրքում։
Հիշեցնենք, որ այս կոնսենսուսը միտված էր միջազգային կառույցներից վերահսկողական մեխանիզմների գործադրման համար ֆինանսական աջակցություն ստանալուն։ Սակայն հիմա պարզվում է՝ նախկինում շրջանառված 16 միլիոն եվրոյից 11.5 միլիոնն են տրամադրելու դոնոր կազմակերպությունները, իսկ իշխանությունը չի պատրաստվում բացը լրացնել։
