ԱՄՆ նախագահ Բարաք Օբաման չի կարողացել նշել «Գահերի խաղը» սերիալի բոլոր մահացած հերոսների անունները։ Նախագահը նկարահանվել է «5 բան, որոնք ավելի դժվար են, քան քվեարկության համար գրանցվելը» տեսահոլովակում, որտեղ փորձել է տարբեր առաջադրանքներ կատարել, այդ թվում՝ թվարկել հանրահայտ սերիալի մահացած հերոսներին։ Տեսագրությունը հրապարակվել է YouTube–ում BuzzFeedVideo–ի էջում։

Cinema Blend–ի փոխանցմամբ՝ Օբաման սկզբում լավ է սկսել՝ տալով Նեդ Սթարքի, Ռոբ Սթարքի եւ կհալ Դրոգոյի անունները։ Հետո, փորձելով քանդել ականջակալերի հանգույցը, Օբաման տվել է Ջոն Սնոուի անունը, որը, ինչպես գիտենք, նորից ողջ է։

Դրանից հետո ԱՄՆ նախագահը հիշել է Ռենլի Բարաթեոնին, Ամառ, Փռչոտ քոթոթ անուններով կենդանիներին, Խոդորին, Թայվին Լանիսթերին, արքայազն Օբերինին, վայրենի Իգրիթին, Ջոֆրի Բարաթեոնին։

Պարբերականը ենթադրում է, որ Օբաման, հավանաբար, չի նայել «Գահերի խաղը» սերիալի 6-րդ եթերաշրջանը, այդ պատճառով չի նշել այդ եթերաշրջանում զոհվածների անունները։ Հաղորդվում է, որ ընդհանուր առմամբ, սերիալի սկզբից զոհվել է անուն ունեցող մոտ 500 հերոս։