ՌԴ-ի փոխվարչապետ Դմիտրի Կոզակը չի բացառում դեպի Թուրքիա զբոսաշրջային ուղեւորությունների վերականգնումը եւ թուրքական շինարարական ընկերությունների աշխատանքի սահմանափակումների վերացումը, հայտնում է ՏԱՍՍ-ը:
«Ամեն ինչ հնարավոր է»,- լրագրողներին ասել է պաշտոնյան: Այդպես է նա պատասխանել ռուս-թուրքական հարաբերությունների ջերմացման դեպքում ռուսաստանցիների` Թուրքիա զբոսաշրջային ուղեւորությունները վերականգնելու, ինչպես նաեւ թուրքական շինարարական ընկերությունների աշխատանքի սահմանափակումները հանելու հնարավորության մասին հարցին:
Ռուսաստանի Արտաքին գործերի նախարարությունը (ԱԳՆ) 2015-ի նոյեմբերի 24-ին ռուսաստանցիներին խորհուրդ էր տվել անվտանգության սպառնալիքների պատճառով զերծ մնալ Թուրքիա ուղեւորություններից: Ռոստուրիզմն իր հերթին ռուսաստանցի տուրօպերատորներին խորհուրդ էր տվել դադարեցնել դեպի Թուրքիա ուղեւորությունների վաճառքը եւ ուղղակիորեն կամ երրորդ երկրների միջոցով այդ երկիր զբոսաշրջիկներ ուղարկելը: Ռուսաստանյան խոշորագույն տուրօպերատորները համաձայնել էին գերատեսչության հանձնարարականին:
Միաժամանակ Ռուսաստանը չի դադարեցրել Թուրքիայի հետ կանոնավոր ավիահաղորդակցությունը եւ ինքնուրույն զբոսաշրջիկները կարող են առանց սահմանափակումների այցելել այդ երկիր:
Բացի այդ, 2015-ի վերջին ՌԴ-ի կառավարությունը հաստատել է աշխատանքների առանձին ցուցակների ցանկը, որոնք 2016-ի հունվարի 1-ից արգելված է կատարել Թուրքիայում գրանցված կազմակերպություններին, ինչպես նաեւ այն կազմակերպություններին, որոնք վերահսկվում են Թուրքիայի քաղաքացի եւ (կամ) այնտեղ գրանցված մարդկանց կողմից:
Այդ ցանկի մեջ են մտել շենքերի, ինժեներական կառույցների շինարարությունը եւ մասնագիտացած շինարարական աշխատանքները, ճարտարապետության եւ ինժեներատեխնիկական նախագծման, հետազոտությունների եւ վերլուծության ոլորտում գործունեությունը, զբոսաշրջային գործակալների եւ զբոսաշրջության ոլորտում ծառայություններ մատուցող այլ կազմակերպությունների գործունեությունը, հյուրանոցների եւ ժամանակավոր կեցության այլ վայրերի գործունեությունը, պետական եւ քաղաքային կարիքների համար աշխատանքների կատարումը, ծառայությունների մատուցումը, փայտի մշակությունը: