Հայաստանը 3 տարվա ընթացքում ավելացված արժեքի հարկից պետք է անցնի շրջանառության հարկի: Այս մասին այսօր՝ հունիսի 28-ին, Ազգային ժողովում «Ավելացված արժեքի հարկի մասին» Հայաստանի Հանրապետության օրենքում լրացումներ կատարելու մասին նախագծի քննարկման ժամանակ ասաց ՀԱԿ խմբակցության պատգամավոր Հրանտ Բագրատյանը:
«Ես դեմ չեմ, որ այս նախագիծն ընդունվի, բայց համառորեն պնդում եմ, որ երեք տարվա ընթացքում Հայաստանը ավելացված արժեքի հարկից անցնի շրջանառության հարկի, որը թույլ կտա անցնել ավելի պարզեցված հարկային համակարգի եւ ներդաշնակացնել փոքրի ու միջին ու խոշորի հարկումը, որը շատ հրատապ է մեզ համար: Եթե ԱԱՀ-ն մնա, մենք դրան երբեք չենք հասնի»- ասաց Հրանտ Բագրատյանը:
ՀԱԿ պատգամավորի կարծիքով՝ Հայաստանը պետք է հետեւի զարգացած երկրների օրինակին, որոնք արդեն հրաժարվել են ավելացված արժեքի հարկից:
ԱԺ ԲՀԿ խմբակցության պատգամավոր Միքայել Մելքումյանը համակարծիք է Հրանտ Բագրատյանի հետ, սակայն պետք է գնահատել ռիսկերը. «Շրջանառության հարկի ամենամեծ խնդիրը վարչարարությունն է, որ Կառավարությունը չի կարողանում ֆիքսել ճիշտ շրջանառությունը»:
Նշենք, որ Կառավարությունն առաջարկում է «Ավելացված արժեքի հարկի մասին» ՀՀ օրենքում լրացումներ կատարել, որով դրամաշնորհների միջոցով իրականացվող ծրագրերը կազատվեն հարկից, եթե կարժանանան Կառավարության մասնագիտական հանձնաժողովի հավանությանը։