2014թ. հունիսի 3-ից մինչեւ 2015թ. մարտի 15-ն ընկած ժամանակահատվածում անվճարունակ քաղաքացի Հրաչյա Հ.-ի եւ 8 ավտոմեքենաների սեփականատերերի անուններով ՀՀ ճանապարհային ոստիկանությունում խաբեությամբ ներկայացվել են դիմումներ այն մասին, թե, իբր, սեփականության իրավունքով 8 տարբեր անձանց ավտոմեքենաները վարել կամ այդուհետ վարելու է Հրաչյա Հ.-ն:

ՀՔԾ-ից NEWS.am-ին հայտնում են, որ վերջինս դիմումներով խնդրել է նշված ավտոմեքենաների կողմից ճանապարհային երթեւեկության կանոնների կատարված եւ հետագայում հնարավոր կատարվելիք խախտումների համար նախատեսված վարչական տույժերը նշանակել իր անվամբ:

Ներկայացված դիմումների հիմքով ՀՀ ճանապարհային ոստիկանության էլեկտրոնային ռեգիստրում կատարվել են համապատասխան փոփոխություններ եւ 2014թ. հունիսի 3-իցմինչեւ 2016թ. մայիսի 22-ն ընկած ժամանակահատվածում հիշյալ թվով ավտոմեքենաներով թույլ տրվածճանապարհային երթեւեկության կանոնների խախտումների վերաբերյալ կազմված վարչական տույժ նշանակելու մասին թվով 1072 որոշումները կայացվել են Հրաչյա Հ.-ի անվամբ եւ ուղարկվել նրա հասցեով:Նշված որոշումներով վարչական տույժերը չեն գանձվել, արդյունքում՝ գույքի տիրապետող ՀՀ ճանապարհային ոստիկանությանը խաբեությամբ պատճառվել է առանձնապես խոշոր չափերի՝ շուրջ 9մլն. 550 հազ. ՀՀ դրամի գույքային վնաս:

Մի խումբ անձանց կողմից նախնական համաձայնությամբ, խաբեության եղանակով գույքի տիրապետող ՀՀ ճանապարհային ոստիկանությանն առանձնապես խոշոր չափի վնաս պատճառելու դեպքի առթիվ ՀՀ հատուկ քննչական ծառայությունում ՀՀ քրեական օրենսգրքի 184-րդ հոդվածի 2-րդ մասի 1-ին եւ 2-րդկետերով հարուցվել է քրեական գործ:

Կատարվում է նախաքննություն: