Ռուսաստանի հետ ՀՕՊ միավորված համակարգ ստեղծելու համաձայնագրում կառավարում տերմինը անմիջական ղեկավարումն է եւ այս դրույթը վերապահված է հայկական կողմին: Այս մասին, այսօր՝ հունիսի 28-ին, Ազգային ժողովում լրագրողների հետ զրույցում ասել է պաշտպանության փոխնախարար Արա Նազարյանը` արձագանքելով այն մտահոգություններին, որ ՌԴ-ի հետ ՀՕՊ միավորված համակարգ ստեղծելու մասին համաձայնագրով Հայաստանը օդային պաշտպանության իրավունքը զիջում է Ռուսաստանին:
«Հայաստանի Հանրապետությունը Ռուսաստանում չունի տեղակայված որեւէ ռազմաբազա, բայց Ռուսաստանի դաշնությունը ունի եւ էս տեսանկյունից լրացուցիչ ռեսուրս է, եւ լրացուցիչ կառավարելու է ՀՕՊ մասով նաեւ իրենց տեղակայված տեղակայված միջոցները»,-ասաց Նազարյանը:
Վերջինս համաձայնագրից ընթերցեց 6-րդ հոդվածի 3-րդ մասը, ըստ որի ՀՕՊ միավորված համակարգերի համատեղ գործողությունների կառավարումը իրականացնում է Հայաստանի Հանրապետության զինված ուժերի Հակաօդային պաշտպանության զորքերի պետը: «Համաձայնագրի 7-րդ կետով սահմանում է, որ հավաքական անվտանգության կովկասյան տարածաշրջանում ՀՕՊ միավորված տարածաշրջանային հակաօդային պաշտպանության հերթափոխ ուժերի կողմից զենքի կիրառման կարգը սահմանվում է այն կողմի օրենսդրությամբ, որի օդային տարածքում գտնվում է օբյեկտը, որի նկատմամբ կիրառվում է զենքը»,-նշեց փոխնախարարը:
Ինչ վերաբերում է Թեւան Պողոսյանի այն հարցադրմանը, թե հերիքելո՞ւ է հայկական կողմի «դուխը», որ ՀՕՊ-ն իրագործի առանց Ռուսաստանի թույլտվության, Նազարյանն արձագանքեց. «Մեր դուխը հերիքում է, եւ մենք ինքնուրույն պետք է ամեն ինչ պլանավորենք, սա ուղղակի լրացուցիչ ռեսուրս է, որից չենք հրաժարվում»:
Հարցին, թե եթե Ռուսաստանը հարաբերությունները բարելավում է Թուրքիայի հետ, մենք կարո՞ղ ենք դա օգտագործել իր դաշնակիցներ Ադրբեջանի եւ Թուրքիայի դեմ, փոխնախարարը պատասխանեց. «Մեզ իրավունք է վերապահված օգտագործելու»:
Դիտարկմանը, թե այդ դեպքում ինչու հայկական կողմը քայլ չարեց, երբ Թուրքիան խախտել էր հայ-թուրքական օդային սահմանը, նա ընդգծեց. «Այ հիմա արդեն ավելի օպերատիվ կլինի»:
