ՌԴ-ի հետ ՀՕՊ միավորված համակարգ ստեղծելու համաձայնագիրը չի վերաբերում Արցախին: Այս մասին այսօր՝ հունիսի 28-ին, 2015 թվականի դեկտեմբերի 23-ին Մոսկվայում ստորագրված «Հայաստանի Հանրապետության եւ Ռուսաստանի Դաշնության միջեւ Հավաքական անվտանգության կովկասյան տարածաշրջանում հակաօդային պաշտպանության միավորված տարածաշրջանային համակարգ ստեղծելու մասին» համաձայնագիրը վավերացնելու մասին հարցի քննարկման ժամանակ ասաց Պաշտպանության նախարարի տեղակալ Արա Նազարյանը՝ անդրադառնալով ՀԱԿ խմբակցության պատգամավոր Լյուդմիլա Սարգսյանի դիտարկմանը, թե մարդիկ մտահոգություն ունեն, որ եթե ղարաբաղա- ադրբեջանական շփման գծում բախումներ սկսվեն, իսկ ռուսական կողմն էլ ունենա այլ դիրքորոշում, Հայաստանը ՀՕՊ համակարգը կիրառելու հնարավորություն չի ունենա:
«Համաձայնագիրը վերաբերում է միայն Հայաստանին ու Ռուսաստանին, սա չի տարածվելու Արցախի վրա»,- ասաց Արա Նազարյանը:
Հիշեցնենք, որ հունիսի 3-ին ՀՀ ԱԺ արտաքին հարաբերությունների մշտական հանձնաժողովի նիստում քննարկվել է 2015թ. դեկտեմբերին ստորագրված «ՀՀ եւ ՌԴ միջեւ Հավաքական անվտանգության կովկասյան տարածաշրջանում ՀՕՊ միավորված տարածաշրջանային համակարգ ստեղծելու մասին» համաձայնագիրը: Այն դրական եզրակացությամբ ընդգրկվել է ԱԺ նիստերի օրակարգում՝ վավերացման համար:
Այս համաձայնագիրը հակազդեցություն է առաջացրել որոշակի քաղաքական ու քաղաքացիական շրջանակների կողմից, որոնք նշում են, որ սրանով Հայաստանը Ռուսաստանին է զիջում նաեւ իր օդային տարածքն ու անվտանգությունը: Նշվում է, որ ըստ այդ համաձայնագրի` ստեղծվելու է Հայկական հակաօդային պաշտպանությունը կարգավորող մի մարմին, որը կառավարվելու է Ռուսաստանի կողմից: