Ֆեդերացիայի խորհրդի պաշտպանության ու անվտանգության հարցերով հանձնաժողովի ղեկավարի առաջին տեղակալ Ֆրանց Կլինչեւիչը հայտնել է, որ Անկարան Ռուսաստանին փոխհատուցում չի վճարելու խոցված «Սու 24» ռմբակոծիչի համար, հայտնում է «Խոսում է Մոսկվան» ռադիոկայանը:
«Սա արեւելյան խորամանկություն է, հող շոշափելու փորձ: Խնդիրը փոխհատուցումը չէ, մենք այստեղ սովից չենք մահանում, խոսքը բարոյական կողմի մասին է, ճիշտ, մարդկային հարաբերությունների դրսեւորելու մասին: Այն ինչ այսօր Թուրքիան է դրսեւորում՝ դեռ ոչնչով չի նպաստում մեր երկրների միջեւ հարաբերությունների հարթմանը»,- ասել է նա:
Կլինցեւիչի խոսքով, այս իրավիճակում ակնհայտ է խորամանկությունն ու խուսանավելու ցանկությունը:
Նախօրեին ՌԴ նախագահի մամուլի քարտուղար Դմիտրի Պեսկովը հայտնել էր, որ Թուրքիայի նախագահ Ռեջեփ Թայիփ Էրդողանը Վլադիմիր Պուտինին հասցեագրված ուղերձում ներողություն է խնդրել խոցված ռուսական «Սու 24»-ի համար: Էրդողանի ներկայացուցիչն էլ իր հերթին հայտնել է, որ Էրդողանի նամակում եղել է արտահայտություն այն մասին, որ Թուրքիայի նախագահը հույս ունի, որ «Սու 24»-ի զոհված օդաչուի ընտանիքը «կների մեզ»:
Դրանից հետո Թուրքիայի վարչապետ Բինալի Յըլդըրըմը պատրաստակամություն է հայտնել խոցված «Սու 24»-ի համար Ռուսաստանին փոխհատուցում վճարելու հարցում: Իսկ հաջորդ օրը Թուրքիան հայտարարել է, որ մտադիր չէ փոխհատուցում վճարել Ռուսաստանին:
