Երեւանում հունիսի 28-ին մեկնարկել է «Աղետների ռիսկերի կրճատում ՝Հարավային Կովկասում համայնքների ու կառույցների դիմացկունության բարձրացման նպատակով» տարածաշրջանային ծրագիրը:
Նախաձեռնությունը, որը ֆինանսավորվում է Եվրոպական հանձնաժողովի կողմից Աղետներին նախապատրատվելու DIPECHO IV ծրագրի շրջանակում, իրականացնում են Կարմիր խաչի հայկական միությունը, Հայաստանում OXFAM ընկերությունը՝ OxYGen հիմնադրամի հետ համատեղ, ՄԱԿ- ի մանկական հիմնադրամը (UNICEF), ՄԱԿ-ի զարգացման ծրագիրը (UNDP) ու Save the Children նախաձեռնությունը:Ծրագիրը շարունակվելու է մինչեւ 2017 թ. ու իրականացվում է Հայաստանի արտակարգ իրավիճակների, կրթության ու գիտության, տարածքային կառավարման ու զարգացման նախարարությունների, նաեւ Աղետների ռիսկերի կրճատման հարցերով ազգային հարթակի հետ սերտ համագործակցությամբ:
Ազգային հարթակի տնօրեն Մովսես Պողոսյանը վստահություն է հայտնել . «Թե Շիրակի, թե Տավուշի մարզերում, համայնքներում աշխատող մեր գործընկերները նպաստելու են աղետների նկատմամբ համայնքների դիմացկունության բարձրացմանը: Նրանք կարող են համայնքներին տրամադրել փրկարարական միջոցներ, արձագանքման համակարգեր: Մանավանդ համայնքների խոշորացումից հետո ռիսկերի գործոնը զգալիորեն ավելանալու է: Իսկ մեր միջազգային գործընկերների ներդրումները բխում են պետության շահերից»:
Հայաստանում ԵՄ պատվիրակության համագործակցության բաժնի ղեկավար Խոա Բին Աճեմյանը իր հերթին շեշտել է, որ այս նախագիծը մեծ կարեւորություն ունի ԵՄ-ի համար: Նրա խոսքով, ԵՄ-ն միշտ պատրաստ է աջակցել Հայաստանին ՝ իրազեկման բարձրացման ու հնարավոր աղետներին պատրաստված լինելու հարցերում: