Հայաստանում կձեւավորվեն շուրջ 55 համալիր սոցիալական կենտրոններ: Այս մասին, այսօր՝ հունիսի 28-ին, Արագածոտնի մարզ այցելության ժամանակ նշել է ՀՀ աշխատանքի եւ սոցիալական հարցերի նախարար Արտեմ Ասատրյանը, ում ուղեկցել է Արագածոտնի մարզպետ Գաբրիել Գյոզալյանը:
Նախարարությունից NEWS.am-ին հայտնում են, որ առաջին կանգառը Ապարան քաղաքն էր, որտեղ նախարարը մարզպետի եւ Ապարանի քաղաքապետի ուղեկցությամբ եղել է Զբաղվածության գործակալության կողմից կազմակերպված Աշխատանքի տոնավաճառում, որին մասնակցում էին մարզի մի քանի համայնքների 29 գործատու՝ առաջարկելով 92 թափուր աշխատատեղ:
Նախարար Արտեմ Ասատրյանը շփվել է գործատուների եւ աշխատանք փնտրողների հետ, ծանոթացել առաջարկվող աշխատանքներին, ներկայացվող պահանջներին:
«Աշխատանքի տոնավաճառը մեր զբաղվածության պետական հաջողված ծրագրերից է, որը հնարավորություն է ընձեռում անմիջական շփումների միջոցով աշխատանք փնտրողների եւ աշխատանք առաջարկողների միջեւ կապ ապահովել, ինչի արդյունքում աշխատանք գտնելու հնարավորություներն ավելի են մեծանում»,-նշել է նախարարը:
Աշխատանքային այցի շրջանակներում նախարարը ծանոթացել է Ապարան եւ Աշտարակ քաղաքներում համալիր սոցիալական կենտրոնների համար նախատեսված շենքային պայմաններին, ընդգծել մարզում կենտրոններ ստեղծելու կարեւորությունը, որոնք քաղաքացիներին մատուցելու են համալիր սոցիալական ծառայություններ:
Նախարարի խոսքով՝ ծրագրի արդյունքում հանրապետությունում կձեւավորվեն շուրջ 55 համալիր սոցիալական կենտրոն:
Նախարար Արտեմ Ասատրյանի աշխատանքային այցի վերջին կանգառը Փարպի համայնքն էր, որտեղ նախարարը ծանոթացել է ժամանակավոր զբաղվածություն ապահովող ծրագրերից մեկի՝ «Վարձատրվող հասարակական աշխատանք» ծրագրի արդյունքներին:
Ծրագրի արդյունքում Փարպի համայնքում իրականացվել է մարզադաշտի բարեկարգում, հանդերձարանների կառուցում եւ համապատասխան վերանորոգումներ:
«Վստահ եմ, որ համայնքի բնակչությունը բավականին ոգեւորված է ծրագրով, քանի որ պետական ծրագրի շրջանակներում իրականացվել է համայնքային ծրագիր, որը անհրաժեշտ է համայնքի բնակչությանը: Միաժամանակ, ծրագիրը ժամանակավոր զբաղված է դարձրել համայնքի սոցիալապես անապահով բնակիչներին, ովքեր աշխատանքի դիմաց օրական վարձատրվել են 5 հազար դրամ»,-նշել է նախարարը եւ հավելել, որ «Վարձատրվող հասարակական աշխատանք» ծրագիրը համայնքային ենթակառուցվածքների վերանորոգման, վերակառուցման խնդիրների լուծման տեսանկյունից ժամանակավոր զբաղվածության լավագույն ծրագրերից մեկն է: