Պաշտպանության նախարարությունը արտասահմանյան մի քանի կլինիկայի հետ բանակցություններ է վարում` հասկանալու, թե նրանք ինչ կարող են առաջարկել ապրիլյան պատերազմի ընթացքում վիրավորված Ռոլանդ Սահակյանին եւ Ավետիս Զարգարյանին: Այդ մասին NEWS.am-ի թղթակցին հայտնել է Հայաստանի Պաշտպանության նախարարության ռազմաբժշկական վարչության պետ, գնդապետ Կամավոր Խաչատրյանը:
Նրա խոսքով, Պաշտպանության նախարարության աշխատակիցներն արդեն փաստաթղթերն ու վիրավոր տղաների մասին բոլոր տվյալներն ուղարկել են լավ համբավ ունեցող մի քանի կլինիկա, որոնք ֆիզիոթերապեւտիկ բուժման եւ վիրահատության ոլորտում լավ համբավ ունեն, եւ այժմ նրանցից պատասխան են սպասում: Երբ պարզ դառնա, թե տղաներին ճշգրիտ ինչ բուժում կարող են առաջարկել այդ կլինիկաներում եւ ինչ գնով, տեղեկությունների ամբողջական փաթեթը կուղարկվի Առողջապահության նախարարության ստեղծած հատուկ հանձնաժողով, որը որոշում է կայացնում վիրավոր զինվորների բուժումն արտասահմանում կազմակերպելու մասին Հայաստանում այն կազմակերպելու անհնարինության պատճառով:
Կամավոր Խաչատրյանը նշել է, որ հանձնաժողովը կազմված է մի շարք բժիշկներից, որոնց թվում են Առողջապահության նախարարության գլխավոր մասնագետներ եւ մի քանի մասնագետ Պաշտպանության նախարարությունից եւ նրանք պետք է կոլեգիալ որոշում կայացնեն այն մասին, թե ինչ է պետք անել` տղաներին արտասահման ուղարկել, թե նրանց բուժումն այստեղ կազմակերպել` Հայաստանում:
Հիշեցնենք, որ 19-ամյա Ռոլանդ Սահակյանին, որը ողնաշարի վնասվածք է ստացել, արդեն 6 վիրահատություն են կատարել. 19-ամյա Ավետիս Զարգարյանը եւս շատ ծանր վնասվածքներ է ստացել. Գնդակը մտել է նրա ծնոտ եւ վնասել է մի քանի ող:
Ավելի վաղ Կենտրոնական հոսպիտալի պետ Արամ Ասատրյանը NEWS.am-ի թղթակցին հայտնել էր, որ Ավետիսի եւ Ռոլանդի արտասահմանում բուժման հարցը քննարկվում է: Առողջապահության նախարար Արմեն մուրադյանը լրագրողների հետ զրույցում հայտնել էր, որ Առողջապահության նախարարությունում ստաեղծված հատուկ հանձնաժողովը հայտարարություն չի ստացել Ռոլանդի եւ Ավետիսի բուժումն արտասահմանում կազմակերպելու համար:
Հիշեցնենք նաեւ, որ ապրիլյան իրադարձություններից հետո Հայաստանի կառավարությունը որոշում է կայացրել այն մասին, որ վիրավորները, որոնց չեն կարողանա Հայաստանում պատշաճ օգնություն տրամադրել, բուժման կուղարկվեն արտսահման բյուջետային միջոցներով:
Սակայն մինչ օրս այդ որոշումը չի կիրառվել որեւէ զինվորի նկատմամբ: Գերմանիայում գտնվող Արամ Լազգիյանը եւ Ռուբեն Առաքելյանը այժմ Գերմանիայում բուժում են ստանում, բայց դրա գումարը հավաքվել է մասնավոր նվիրատվությունների միջոցով: