Ֆրանսիայի «Ազգային ճակատ» կուսակցության նախագահ Մարին Լե Պենը կարծում է, որ Եվրամիությունը «ժողովուրդների բանտ է», իսկ դրա ճակատագիրը համեմատում է ԽՍՀՄ–ի հետ։ Այս մասին նա գրել է The New York Times–ում լույս տեսած հոդվածում։

«Եվրամիության ճակատագիրն ավելի ու ավելի է հիշեցնում ԽՍՀՄ ճակատագիրը, որը մահացավ սեփական հակասություններից»,– կարծում է Լե Պենը։

Քաղաքական գործչի կարծիքով ԵՄ–ն սպառել է իրեն։ «Եվրամիությունը ժողովուրդների համար բանտ է դարձել։ 28 երկրներից յուրաքանչյուրը աստիճանաբար իր ժողովրդավարական նվաճումները զոհաբերում է հանձնաժողովներին եւ խորհուրդներին, որոնք երբեք ժողովրդական մանդատ չեն ունեցել»,– գրում է նա։

Ֆրանսիացի քաղաքական գործիչը հիշեցնում է անդամ երկրների ընդունած օրենքները, որոնք հակասում են սեփական շահերին, խոսում սահմանների հարկադիր բացման, եվրոգոտու ճգնաժամի մասին։ Նրա խոսքով՝ ԵՄ բնակիչներն ընդամենը մեկ այլընտրանք ունեն՝ կամ ձեռք ու ոտքը կապած՝ մնալ Միությունում, որը դավաճանում է ազգային շահերը, կամ քվեարկության միջոցով վերադարձնել ազատությունը։