Apple ընկերությունը եւս մի դատավարության պետք է մասնակցի եւ այս անգամ դատի նախաձեռնողը Ֆլորիդայի նահանգի քաղաքացի է, որը հայտնում է, որ ինքն առաջինն է ստեղծել iPhone-ը:
The New York Daily News պարբերականը հայտնում է, որ գյուտարար Թոմաս Ռոսսն արդեն դատարանին է ներկայացրել իր գծագրերը, որոնք թվագրված են 1992 թվականով: Նա պատրաստ է ապացուցել, որ սմարթֆոնի գաղափարի հեղինակն է: Եվ այժմ Ռոսսը ցանկանում է ընկերությունից դատարանի միջոցով մոտ 10 մլրդ դոլար ստանալ եւ հայտնում է, թե իրեն «նշանակալի եւ անշրջելի վնաս է հասցվել»: Ռոսսը նաեւ ցանկանում է հասնել նրան, որ ընկերության վաճառքի ամբողջ ծավալից եկամտի 1,5 տոկոսն իրեն վճարվի որպես հոնորար, հայտնում է Informing-ը:
Ռոսսի ներկայացրած գծագրերից դատելով, սարքը, որը նա նախագծել է, աննշան նմանություն ունի 2007 թվականի արտադրության iPhone-ի հետ: Գծագրերում մեծ էկրանով ուղղանկյուն է պատկերված: Գծագրերից մեկում պատկերված է բացվող մոդել` երկու կողմից սենսորային էկրաններով: Բայց, ինչպես նշում է պարբերականը, այդ սարքն ավելի շատ նման է Nintendo խաղային համակարգին:
1992-ին Ռոսսը փորձել է իր գյուտն արտոնագրել որպես «ընթերցանության համար էլեկտրոնային սարք» (electronic reading device): Բայց քանի որ չի կարողացել վճարել արտոնագրային գումարը, արտոնագրի գրանցման գործը փակվել է 1995-ին: Երբ 2007-ին Սթիվ Ջոբսը ներկայացրել է iPhone-ը, Ռոսսը դատի է տվել ԱՄՆ-ի Արտոնագրային գերատեսչությանը:
Ռոսսը պատմել է, որ Apple-ից պահանջում է դադարեցնել իրենից գողացված գաղափարների հիման վրա արտադրվող սարքերի թողարկումը: Համապատասխան նամակը, նրա խոսքով, ինքն արդեն ուղարկել է Թիմ Կուկին: Բայց Apple-ի իրավաբան Ջեֆֆրի Լասկերը նշել է, «որ բոլոր նման հավակնությունները հիմք չունեն եւ օբյեկտիվորեն անապացուցելի են»:
