ԵՄ կազմից Ֆինլանդիայի դուրս գալու հարցով հանրաքվե գործող կառավարության օրոք չի լինելու։ Այս մասին հունիսի 29-ին ասել է Ֆինլանդիայի ԱԳ նախարար, «Իրական ֆիններ» կուսակցության նախագահ Տիմո Սոյնին։ Նրա կուսակցությունն ավանդաբար համարում են եվրասկեպտիկների կուսակցություն, գրում է ՏԱՍՍ—ը։
ԱԳ նախարարը մեկնաբանել է անցյալ շաբաթ «Իրական ֆիններ» կուսակցության երիտթեւի նախաձեռնությունը, որով ստորագրահավաք էր սկսվել Բրիտանիայի օրինակով հանրաքվե անցկացնելու համար։ Մեկ շաբաթում այն ստորագրել է մոտ 21 հազար մարդ, իսկ խորհրդարանում քննարկվելու համար անհրաժեշտ է 50 հազար ստորագրություն, որն հավաքելու համար կես տարի ժամանակ է տրվում։
«Հանրաքվեն, եթե այն անցկացվի, կլինի կառավարության որոշմամբ։ Առանց կառավարության, ոչինչ կազմակերպել չի կարելի։ Ներկայիս կառավարության դիրքորոշման համաձայն՝ նման հանրաքվե չի անցկացվի։ Դա գրված է կառավարական ծրագրում, եւ կառավարությունը դրան հետեւում է»,– ընդգծել է նա։
«Սակայն քաղաքացիական նախաձեռնությունն այլ բան է։ Նա քննարկում է սկսում, որը լավ բան է։ Այդպես՝ Պաավո Վյարյունեն դարձել է եվրոգոտուց դուրս գալու նախաձեռնության հեղինակը, որն արդեն քննարկվում է խորհրդարանում»,– ասել է նախարարը։
Սոյնիի խոսքով՝ Ֆինլանդիայում խոսքի ազատություն է, այդ պատճառով էլ բազմաթիվ քաղաքացիական նախաձեռնություններ են ստեղծվում, որոնք հայտնվում են խորհրդարանում, սակայն նախաձեռնության ի հայտ գալը չի նշանակում, որ որոշումն արդեն կայացվել է։