«Գահերի խաղը» սերիալի վեցերորդ եթերաշրջանի եզրափակիչ դրվագը սերիալի պատմության մեջ ամենամեծ քանակության հանդիսատեսն է ունեցել, հայտնում է The New York Times–ը՝ վկայակոչելով Nielsen–ի տվյալները: Հունիսի 26-ին «Ձմռան քամիները» դրվագը HBO հեռուստաալիքով դիտել է 8.9 մլն հանդիսատես:
Նախորդ ռեկորդը հինգերորդ եթերաշրջանի եզրափակիչ դրվագինն էր՝ 8.1 մլն հանդիսատես:
Ակնկալվում է, որ առաջիկա շաբաթներին «Ձմռան քամիները» ֆիլմի ցուցանիշները կշարունակեն բարելավվել, քանի որ դրվագը դիտելու են «տեսագրություն ըստ պահանջի» ծառայության օգնությամբ ու HBO Now հավելվածում:
HBO-ից պատմել են, որ վեցերորդ եթերաաշրջանի հանդիսատեսի ընդհանուր թիվը՝ հաշվի առնելով հեռուստատեսությամբ օրիգինալ հեռարձակումները, կրկնությունները, «պահանջով տեսագրություններն» ու սթրիմինգային ծառայություններով դիտումները հասել է շաբաթական միջինը 23.3 մլն-ի: Սա 15 տոկոսով շատ է 2015-ի ցուցանիշներից:
Այս պահին հեռուստաալիքը դեռ չի հայտնել, թե «Գահերի խաղը» սերիալի քանի նոր եթերաշրջան կամ դրվագ է ծրագրվում թողարկել, բայց սերիալի հեղինակները հայտնել են որ լինելու են երկու՝ համեմատաբար ավելի կարճ եթերաշրջաններ, ընդ որում դրանց դրվագների ընդհանուր թիվը կարող է 13 լինել: