Ազգային ժողովի «Օրինաց երկիր» խմբակցությունը կողմ է քվեարկելու Ռուսաստանի հետ ՀՕՊ միավորված համակարգ ստեղծելու մասին համաձայնագրին: Այս մասին այսօր՝ հունիսի 29-ին, ԱԺ-ում ասաց խմբակցության քարտուղար Մհեր Շահգելդյանը:
«Մենք պրոհայկական ենք եւ մեզ համար ամենակարեւորը հայ ժողովրդի շահն է: Մենք կողմ ենք այս համաձայնագրին, քանի որ կարեւոր է Հայաստանի Հանրապետության անվտանգության համար եւ հետագայում ավելի կարեւոր է լինելու, երբ պահպանելով մեր հրամանատարական հնարավորությունները, ավելացնելու ենք մեր ազդեցությունը տարածաշրջանում»,- ասաց Մհեր Շահգելդյանը:
Հիշեցնենք, որ այսօր Ազգային ժողովում շարունակվում է քննարկվել 2015 թվականի դեկտեմբերի 23-ին Մոսկվայում ստորագրված «Հայաստանի Հանրապետության և Ռուսաստանի Դաշնության միջև Հավաքական անվտանգության կովկասյան տարածաշրջանում հակաօդային պաշտպանության միավորված տարածաշրջանային համակարգ ստեղծելու մասին» համաձայնագիրը:
Այս համաձայնագիրը հակազդեցություն է առաջացրել որոշակի քաղաքական ու քաղաքացիական շրջանակների կողմից, որոնք նշում են, որ սրանով Հայաստանը Ռուսաստանին է զիջում նաեւ իր օդային տարածքն ու անվտանգությունը: Նշվում է, որ ըստ այդ համաձայնագրի` ստեղծվելու է Հայկական հակաօդային պաշտպանությունը կարգավորող մի մարմին, որը կառավարվելու է Ռուսաստանի կողմից:
