ՌԴ ԱԻՆ Մերձմոսկովյան Ժուկովսկի օդակայանից այսօր՝ հունիսի 29-ին կիրականացվի ռուսաստանյան AN148 օդանավի չվերթը դեպի Վլադիկավկազ՝ Վերին Լարսի անցակետում հայտնված մարդկանց տարհանելու նպատակով:
ՌԴ-ում ՀՀ դեսպանությունից NEWS.am-ին հայտնում են, որ ՌԴ-ում ՀՀ ԱԻՆ ներկայացուցիչ Արտակ Ղազարյանը՝ համաձայն հայկական եւ ռուսական կողմերի միջեւ ձեռք բերված պայմանավորվածության, ՌԴ ԱԻՆ օդանավը կիրականացնի երեք չվերթ:
Ըստ դեսպանության ճշտած տվյալների, ներկայումս Վերին Լարսի անցակետում գտնվում է 102 բեռնատար, 40 մարդատար ավտոմեքենա եւ 2-3 ավտոբուս, ընդհանուր առմամբ՝ մոտ 345 մարդ, որոնց մեծ մասը ՀՀ քաղաքացիներ են:
Այս օրերին ՌԴ ԱԻՆ-ի կողմից իրականացված հրատապ միջոցառումների արդյունքում Վերին Լարսի անցակետում հայտնված քաղաքացիներն ապահովվել են սննդով, վրաններով եւ այլ անհրաժեշտ պարագաներով: Շարունակական աջակցություն են ցուցաբերում նաեւ տեղի հայ համայնքային կառույցների ներկայացուցիչները:
Վերին Լարսի անցակետում հայտնված զգալի թվով քաղաքացիների շուրջ ստեղծված իրավիճակի կարգավորման աշխատանքներին աջակցում են նաեւ ՌԴ-ում ՀՀ դեսպանությունը, Դոնի-Ռոստովում ՀՀ Գլխավոր հյուպատոսությունն ու ՌԴ-ում ՀՀ համապատասխան այլ կառույցների ներկայացուցիչները:
ՌԴ-ում ՀՀ դեսպանությունը կրկին հորդորում է ՀՀ քաղաքացիներին՝ մինչեւ իրավիճակի ամբողջական կարգավորումը զերծ մնալ դեպի Ռուսաստան-Վրաստան ավտոմայրուղու Վերին Լարսի անցակետ երթեւեկելուց: