Հանրությունն իրազեկված է Ռուսաստանի հետ ՀՕՊ միավորված համակարգի ստեղծման մասին համաձայնագրի մասին: Այս մասին այսօր՝ հունիսի 29-ին, Ազգային ժողովում վստահեցրեց ՀՀԿ խմբակցության ղեկավար Վահրամ Բաղդասարյանը:
«4 հոգի ցուցարարները, 4 հոգի ընդդիմախոսները ոչ թե իրազեկված չեն, այլ ցանկություն չունեն իրազեկվելու: Նրանց ինչ պայմաններ էլ առաջարկես, ինչ բացատրություններ էլ տաս, ուղղորդված են այլ ուղղությամբ: Այս ձեւաչափը շատ հետաքրքիր է՝ 4+4+114, այսինքն, չորս քաղաքացիական հասարակություն, չորս ընդդիմադիր պատգամավոր, 114 կողմնակից: Կան որոշ մարդկային խմբեր, որտեղ մի մասի համար առհասարակ անթույլատրելի է ԵՏՄ-ն, ՀԱՊԿ-ն կամ ՀՕՊ համաձայնագիրը, մյուս մասի համար էլ՝ ԵՄ-ն, ԵԽԽՎ-ն, ՆԱՏՕ-ն, մենք մեր երկրի անվտանգության ճակատագիրը չենք կարող տալ այդ մարդկային խմբերին: Աղջիկ ջան, ռուսին չես սիրում, ում չես սիրում, ում ոնց ես սիրում, Ձեր քաղաքական սեքսուալ հնարավորությունները մի տեղափոխեք Ազգային ժողով, սա պատկառելի ամբիոն է»,- ասաց Վահրամ Բաղդասարյանը՝ նշելով, որ իրենք թույլ չեն տալու որոշ մարդկային խմբերին մեկուսացնել Հայաստանը:
Հիշեցնենք, որ այսօր Ազգային ժողովում շարունակվում է քննարկվել 2015 թվականի դեկտեմբերի 23-ին Մոսկվայում ստորագրված «Հայաստանի Հանրապետության եւ Ռուսաստանի Դաշնության միջեւ Հավաքական անվտանգության կովկասյան տարածաշրջանում հակաօդային պաշտպանության միավորված տարածաշրջանային համակարգ ստեղծելու մասին» համաձայնագիրը:
Այս համաձայնագիրը հակազդեցություն է առաջացրել որոշակի քաղաքական ու քաղաքացիական շրջանակների կողմից, որոնք նշում են, որ սրանով Հայաստանը Ռուսաստանին է զիջում նաեւ իր օդային տարածքն ու անվտանգությունը: Նշվում է, որ ըստ այդ համաձայնագրի` ստեղծվելու է Հայկական հակաօդային պաշտպանությունը կարգավորող մի մարմին, որը կառավարվելու է Ռուսաստանի կողմից:
