ՆԱՍԱ-ն փորձարկել է SLS գերծանր հրթիռի շարժիչը: Ամերիկյան Յուտա նահանգի Պրոմոնտորիա քաղաքի շրջակայքում կատարվել է Space Launch System գերծանր հրթիռակրի շարժիչի վերջին ցամաքային փորձարկումը: Այն նախատեսված է ուղեծրի սահմաններից դուրս գիտարշավների, նաև զանազան բեռներ տիեզերք դուրս բերելու համար, հայտնում է NTDTV-ն:
Փորձարկման ժամանակ 47 մետրանոց շարժիչը հորիզոնական են տեղադրել: Փորձարկումը տևել է երկու րոպե ու հաջող է անցել: Մասնագետները ստուգել են արագացուցիչի աշխատանքը վառելիքի ջերմաստիճանի ստորին սահմանի վրա՝ 4.4 աստիճան ըստ Ցելսիումի:
Տիեզերանավը մշակվել է ՆԱՍԱ գործակալության պատվերով: Առաջին թռիչքը ծրագրված է 2018-ի վերջին: Հրթիռը տիեզերք է դուրս բերելու «Օրիոն» բազմաանշանակակետ կառավարվող նավը, որը պտտվելու է Լուսնի շուրջ: Թռիչքը անօդաչու է լինելու:
Space Launch System –ը մշակվում է «Արես-5» գերծանր հրթիռի փոխարեն: Այն ստեղծվել է «Համաստեղություն» ծրագրի շրջանակում: Նախագահ Օբամայի նախաձեռնությամբ այս նախագիծը փակել էին վեց տարի առաջ անբավարար ֆինանսավորման պատճառով:
Բազային կոմպլեկտավորման նոր գերծանր հրթիռակիրը ունակ է լինելու ուղեծիր հանել 70 տոննա բեռ: Ընդ որում դրա ուժեղացված տարբերակը կկարողանա 130 տոննա քաշով բեռներ տիեզերք հասցնել:
Space Launch System ծրագիրը արժե 35 միլիարդ դոլար: Յուրաքանչյուր արձակումը 500 մլն դոլար կարժենա: Ծրագրվում է, որ ապագայում գերծանր հրթիռը կդառնա «Օրիոն» նավի համար արագացուցիչ, որը Մարս է ուղևորվելու: