Մեծ Բրիտանիայում հանրաքվեն, ինչպես գիտենք, խուճապ առաջացրեց ֆոնդային բորսայում, ինչպես նաեւ հանգեցրեց ֆունտ ստերլինգի նկատելի անկմանը։ Միաժամանակ թուլացել է նաեւ եվրոն։ Ներդրողները անցել են «ապահով» արժույթի՝ առաջին հերթին ԱՄՆ դոլարի եւ ճապոնական իենի։ Հանրաքվեի արդյունքներին արձագանքեցին եւ ապրանքային բորսաները։ Բայց անկայունության առաջին ալիքը կարծես թե թուլացել է։ Օրինակ, վերջին տեղեկություններով, ֆունտ ստերլինգը կտրուկ անկումից հետո մի փոքր կայունացել է։
Brent նավթի ֆյուչերսների գինը սկզբում նվազել էր, բայց հիմա նորից մոտենում է բարելի դիմաց 50 դոլարին։ Նշենք, որ որոշ տեղեկություններով, ֆյուչերսներին բաժին է ընկնում աշխարհում վաճառվող նավթի ավելի քան 70 տոկոսը։ Այսինքն՝ պահի շահարկումների ազդեցության գործոնը նավթի համաշխարհային շուկայում բավական մեծ է։
Ամենայն հավանականությամբ Brent–ի համար 50 դոլարի նիշը կարելի է օպտիմալ համարել։ Ենթադրենք, որ նավթը կթանկանա մինչեւ 60 դոլար։ Այդ ժամանակ նորից կգործարկվեն ԱՄՆ թերթաքարային նավթի հորերը, իսկ գինանիշը կվերադառնա ելման դիրքին։ Մեծ Բրիտանիայում հանրաքվեի արդյունքները դեռեւս աղետալի ազդեցություն են թողել նավթի համաշխարհային գների դինամիկայի վրա։ Այդ առումով ավելի էական են դոլարի փոխարժեքի փոփոխությունները եւ նավթի ընթացիկ պաշարների հաշվետվությունները։
Ըստ որոշ գնահատականների՝ ԱՄՆ տնտեսության աճի տեմպերը ընթացիկ տարվա երկրորդ եռամսյակում վերականգնվել են, եւ երկրի ՀՆԱ ծավալները 2.6 տոկոսով աճել են։ Բացառված չէ, որ այդ դրական տեղաշարժերը կհանգեցնեն ԱՄՆ Դաշնային պահուստային համակարգի դրույքի բարձրացմանը։ Այդ ժամանակ դոլարը ավելի կամրապնդվի շատ երկրների ազգային փոխարժույթների նկատմամբ։
Նշենք, որ համաշխարհային առեւտրում գործարքների մոտ 80 տոկոսն իրականացվում է ԱՄՆ դոլարով։ Արդյունքում հավասար պայմանների դեպքում այդ երկրների համար ներմուծումը թանկանում է, եւ համաշխարհային շուկայում պահանջարկը նվազում է։ Այդ առումով ամենախոցելին հումքն է՝ նավթը, ինչպես նաեւ այն, ինչը հետաքրքիր է մեր երկրի համար, հանքաքարն է եւ մետաղի խտանյութը։
Սակայն հանրաքվեի հետեւանքները թերագնահատելը սխալ կլիներ։ ԵՄ–ից Մեծ Բրիտանիայի դուրս գալու որոշումը աշխարհում անորոշության եւ անկայունության հերթական գործոնն էր թե քաղաքական, թե տնտեսական բնագավառում։