Մեզ գործիքներ պետք չեն, թող մեկը մյուսին գործիքի տեղ չդնի: NEWS.am- ի հետ զրույցում ասաց ՀՀԿ խմբակցության ղեկավար Վահրամ Բաղդարյանն` արձագանքելով այսօր խորհրդարանի դահլիճում փոխադարձ վիրավորա նքներով ու մեղադրանքներով Նիկոլ Փաշինյանի, ՕԵԿ խմբակցության ղեկավար Բիշարյանի եւ ԲՀԿ ղեկավար Նաիրա Զոհրաբյանի բանավեճին:
«Եթե ընդդիմությունը պետք է երկերեսանի լինի, մի կողմից ընդդիմություն խաղա մի կողմից իշխանություն, դա խարխլում է ընդհանուր քաղաքական դաշտը»: Հարցին, թե նշված քաղաքական ուժերից որինն էր ուղղված իր նշած «երկերեսանի» բնութագրումը, պատասխանեց. «Նրանք մեկը մյուսին անհասցե վիրավորանք են հասցնում... ես վաղուց եմ ասել` նրանք մեր հետ կռիվ չունեն, նրանք կռվում են ընդդիմության տեղը զբաղեցնելու համար, ընդդիմության տեղը դատարկ է»:
ՀՀԿ խմբակցության ղեկավարը վստահեցնում է` իրենց ձեռնտու չէ քաղաքական հակառակորդների պայքարը:
«Լրագրողներդ բազմիցս եք ասում` իշխանությունն է քայքայում ընդդիմությանը, իշխանությունը նման խնդիր չունի, մեզ հարկավոր է կայացած ընդդիմություն, որպեսզի իշխանությունն ավելի զգոն լինի: Ինչքան կայացած է ընդդիմությունը, այնքան բարձր է իշխանության հեղինակությունը»,-համոզված է իշխանության ներկայացուցիչը: