Հայաստանը մեծապես կարեւորում է Բունդեսթագը որոշումը: Այս մասին Հայաստանի ԱԳ նախարար Էդվարդ Նալբանդյանը հայտարարեց հունիսի 29-ին Երեւանում Գերմանիայի ԱԳ նախարար, ԵԱՀԿ գործող նախագահ Ֆրանկ-Վալտեր Շթայնմայերի հետ համատեղ մամուլի ասուլիսի ժամանակ:
«Այդ քայլով Գերմանիան մեծ ներդրում ունեցավ ոչ միայն Հայոց ցեղասպանության՝ միջազգայնորեն ճանաչման եւ դատապարտման գործում, այլեւ մարդկության դեմ նման հանցագործության կրկնության դեմ պայքարում»,- նշեց նախարարը՝ հավելելով, որ այդպիսով Գերմանիան նաեւ ընդունեց պատասխանատվության իր բաժինը:
Հիշեցնենք, որ հունիսի 2-ին գերմանական Բունդեսթագը հավանության արժանացրեց Հայոց ցեղասպանությունը ճանաչող բանաձեւը: Դրանում նշվում է, որ Բունդեսթագը խոնարհվում է հայ եւ քրիստոնյա մյուս փոքրամասնությունների առջեւ, որոնք 1915 թվականի տեղահանության եւ կոտորածի զոհ դարձան: Բունդեսթագը նաեւ ճանաչեց 1915 թվականի իրադարձություններում Գերմանիայի պատմական պատասխանատվությունը՝ ափսոսանք հայտնելով, որ Գերմանիայի կառավարությունը ժամանակին ոչինչ չի արել՝ մարդկության դեմ հանցագործությունը կանխելու համար:
