Եվրամիությունը չպետք է Մեծ Բրիտանիային որպես բանտից փախածի վերաբերվի, այլ պետք է որպես պոտենցիալ հայրենակից դիտարկի: Wall Street Journal պարբերականում հրապարակված հոդվածում այս մասին հայտարարել է ԱՄՆ նախկին պետքարտուղար Հենրի Քիսինջերը:
Ըստ քաղաքական գործչի, եվրոպական առաջնորդները բարդ մարտահրավերի առջեւ են կանգնած: «ԵՄ-ն պետք է քննարկի բլոկից Մեծ Բրիտանիայի դուրս գալու պայմանները, որը կցանկանա պահպանել սերտ կապերը Եվրոպայի հետ՝ միաժամանակ ազատվելով ԵՄ-ի իրավաբանական եւ բյուրոկրատական կապանքներից: Սակայն միությունն այլ ծրագրեր ունի»,- նշել է Քիսինջերը:
Նրա կարծիքով, եվրոպացի առաջնորդները մտադիր չեն Բրիտանիայի հեռանալու համար պարգեւատրել ավելի լավ պայմաններով, քան երկիրն ուներ բլոկի կազմում: Քիսինջերը կարծում է, որ Մեծ Բրիտանիային պատժելը պատասխան չէ բլոկի արդիական հարցերի լուծմանը:
«Բայց Բրիտանիան, իր հերթին, պետք է ինքնավարության հայեցակարգ առաջադրի, որի օգտին քվեարկել են իր քաղաքացիները: Մեծ Բրիտանիան եւ Եվրոպան պետք է միասին մտածեն այն մասին, թե ինչպես կարող են վերադառնալ միջազգային կարգ ձեւավորողների իրենց պատմական դերին»,- ընդգծել է ամերիկացի դիվանագետը:
Ըստ ՌԻԱ Նովոստիի, Քիսինջերը նաեւ դիմել է ԵՄ-ի զարգացման հարցում ԱՄՆ-ի մասնակցության հարցին: Նրա կարծիքով, Միացյալ Նահանգները պետք է վերագնահատի իր դերը, հեռանա գերիշխող դիրքից եւ անցնի համոզելու քաղաքականությանը: Փլուզվող Եվրոպան կարող է արդյունքում հանգեցնել ատլանտյան գործընկերության թուլացմանը, ինչը, Քիսինջերի խոսքով, անցյալ դարի ամենանշանակալի ձեռքբերումներից էր: