Ռուս իրավապահները հերքել են տեղեկությունն այն մասին, որ Ստամբուլի օդանավակայանում ահաբեկչության կազմակերպմանը մասնակցություն ունեցողներից մեկը ծագումով Չեչնիայի հանրապետությունից է: Այս մասին «Ինտերֆաքս» գործակալությանը հայտնել է նրա աղբյուրը Հյուսիսային կովկասի դաշնային օկրուգի իրավապահ մարմիններում:
Մինչդեռ Կրեմլում նշել են, որ տեղեկություններ չունեն ան մասին արդյոք Թուրքիան Ռուսաստանից տվյալներ է խնդրել Չեչնիայի ոմն քաղաքացու մասին, որը իբրեւ կասկածվում է ահաբեկչությանը մասնակցության մեջ:
Ավելի վաղ թուրքական լրատվամիջոցները հրապարակել էին տեղեկություն այն մասին, որ Աթաթուրքի անվան օդանավակայանում չորս տասնյակ մարդու կյանք խլած ահաբեկչությանը մասնակցել է Օսման Վադինով անունով մեկը: Սակայն իրավապահ մարմիններում գործակալության աղբյուրը հայտնել է, որ նման անունով մարդ Չեչնիայի հանրապետության տարածքում չի բնակվում ու չի էլ բնակվել: «Ավելին, դա չեչենական անուն ազգանուն չէ»,- շեշտել է գործակալության զրուցակիցը:
Մինչդեռ այլ աղբյուրները հայտնում են Ահմեդ Չատաեւ անունով ոմն չեչենի մասին: Նրա մասին է գրում մասնավորապես Yeni Safak պարբերականը, որի տեղեկություններով Չատաեւը ութ հոգուց բաղկացած մի խմբի անդամ է, որին թուրքական ոստիկանությունը կասկածում է ահաբեկչություն կազմակերպելու մեջ: