Ուշ թե շուտ Ռուսաստանն ու Թուրքիան գտնելու էին իրենց հարաբերությունները բարելավելու ուղիները. եթե կարողանանք օգտվել այդ վատացումից, շատ լավ, եթե չենք կարողանա, ամեն ինչ պետք է անել, որ երբ գա հարաբերությունների լավացման ժամանակը, մեր հաշվին չլինի: Այս մասին այսօր՝ հունիսի 30-ին, լրագրողների հետ հանդիպման ժամանակ նշել է ԱԺ «Ժառանգություն» խմբակցության քարտուղար Թևան Պողոսյանը:
Նրա խոսքով, այսօր Հայաստանի խնդիրն է ձևավորել այնպիսի երկիր, որ պատմությունը չկրկնվի, կարողանանք պաշտպանել մեր շահերը, թույլ չտանք մեր շահերի հիման վրա ուրիշները հարցեր լուծեն:
«Միայն ուժեղ Հայաստան ունենալու դեպքում կարող ենք իսկապես պրոակտիվ հայկական արտաքին քաղաքականություն վարել: Դրա համար պետք է լինենք տնտեսապես ուժեղ, զարգացնել ներքին ժողովրդավարական ինստիտուտները, ձևավորել ճիշտ հարաբերություններ: Եթե քո ողնաշարը թույլ է, կապ չունի ինչքան սիրուն աչքեր ունես կամ ինչքան էլ գրագետ միտք արտահայտես, ոչ մեկ հաշվի չի նստի, հաշվի են նստում ամուր, պինդ մեջքի հետ: Կամ դու սեփականդ ես ստեղծում, կամ կարողանում ես ձեւավորել եւ ուրիշը դառնա քո մեջքը, որ քո փորին երբեւէ չհարվածեն»,- նշեց Թեւան Պողոսյանը:
ԱԺ պատգամավորի խոսքով՝ մենք չունենք ուրիշ մեջք, ստիպված մեր մեջքը պետք է մարզենք: «Մեր ողնաշարը եւ մկանները պետք է ամուր լինեն, այդ ժամանակ կպաշտպանենք մեր շահերը, ինչքան էլ ուրիշները ուրիշ ցանկություն ունենան»:
Թեւան Պողոսյանը նշել է, որ բոլոր հարեւանների հետ էլ պետք է բարելավել հարաբերությունները, այդ թվում հասնել Թուրքիայի հետ սահմանի բացմանը: