Քաղավիացիայի գլխավոր վարչությունը կշարունակի բաց երկնքի քաղաքականությունը։ Այս մասին հունիսի 30-ին՝ Կառավարության նիստից հետո, լրագրողներին ասել է Քաղավիացիայի գլխավոր վարչության նորանշանակ պետ Սերգեյ Ավետիսյանը՝ ընդգծելով, որ սկզբունքորեն համաձայն չէ ռուսական ընկերությունների կողմից ոլորտում «մենաշնորհի» մասին ձեւակերպումների հետ։

Ավետիսյանի խոսքով՝ այն, որ ոլորտում գերակշռում են ռուսական ընկերությունները, ունի իր բացատրությունը. «Պատճառն այն է, որ Հայաստանի քաղաքացիների մեծ մասը մեկնում է ՌԴ, քանի որ այնտեղ մեծ հայկական համայնք կա։ Եթե ինչ–որ մեկը հայտարարի, որ այս կամ այն ավիաընկերությունն ուզում է աշխատել Հայաստանում, բայց խոչընդոտներ են ստեղծվում, ապա ես ամենայն պատասխանատվությամբ հայտարարում եմ, որ նման բան չի կարող լինել։ Բացառված է, որ ավիաընկերությունից կաշառք պահանջեն հայկական ավիացիոն շուկա դուրս գալու համար։ Այն բաց է բոլոր ավիաընկերությունների համար»։

Ի պատասխան հարցին, թե կարող են լոուքոստերները հայկական շուկա մտնել, Քաղավիացիայի գլխավոր վարչության պետը նշեց, որ դա հնարավոր է, սակայն դժվարացել է խոսել ժամկետներից՝ հայտարարելով, որ ավիաընկերությունները ծանրաշարժ են սահմանափակ թվով օդանավերի պատճառով։

Ինչ վերաբերում է ազգային փոխադրողին, ապա պաշտոնյայի խոսքով, այս պահին դա անհնար է, քանի որ ավիացիան թանկարժեք բիզնես է, որը մեծ ներդրումներ է պահանջում։