Իսրայելական իշխանությունները որոշել են շրջափակել 13-ամյա իսրայելցի աղջկա սպանած պաղեստինցու հայրենի գյուղը, նրա հարազատներից հետ վերցնել հրեական պետությունում աշխատանքի իրավունքը եւ քանդել նրա տունը: Այս մասին հաղորդել է կառավարության մամուլի ծառայությունը:
Ըստ ՌԻԱ Նովոստիի, դանակով զինված պաղեստինցին ներխուժել է Հորդանան գետ Արեւմտյան ափի Կիրհատ Արբա հրեական բնակավայր եւ մորթել քնած աղջկան: Մինչ սպանվելը նա հասցրել է վիրավորել նաեւ դեպքի վայր հասած անվտանգության աշխատանցին:
Իսրայելի վարչապետ Բենիամին Նեթանյահուն եւ պաշտպանության նախարար Ավիգդոր Լիբերմանը խորհրդակցություն են անցկացրել, որի ընթացքում սահմանվել են պատասխան գործողությունները:
Նեթանյահուն կոչ է արել Կիրյատ Աբրայում տեղի ունեցած սպանությունը դատապարտել նույն կերպ, ինչպես «Օռլանդոյի եւ Բրյուսելի ահաբեկչությունները»:
Կիրյատ Արբայի սպանությունը մեկն է արաբական հարյուրավոր հարձակումներից, որոնց մինչեւ անցյալ աշուն զոհ է դարձել շուրջ 40 մարդ: Իսրայելական իշխանություններն ընդունում են, որ դրանք իրականացնում են անհատներ՝ հարձակումները չկապելով պաղեստինյան խմբավորումների հետ, բայց նրանց եւ Պաղեստինի իշխանություններին մեղադրում են «ատելության մշակույթ» ձեւավորելու մեջ:
