Ապրիլյան պատերազմում սպանված եւ օրեր անց հայկական կողմին վերադարձված հայ զինծառայողների խոշտանգումների առնչությամբ 6 քրեական գործ է հարուցվել, որոնցից 3-ը՝ գլխատման փաստի առթիվ: Քննությամբ պարզվել է, որ Քյարամ Սլոյանին եւ Հրանտ Ղարիբյանին գլխատել են մահից հետո, իսկ Հայկ Թորոյանին՝ ողջ ժամանակ: Եվս մեկ քրեական գործ է հարուցվել 15 զինծառայողների մարմինների խոշտանգելու գործով: Նրանց մի մասի ականջներն են կտրված եղել, Տիգրան Բերակչյանի մոտ կտրված են եղել եւ ականջները, եւ աջ ձեռքի մատները, Արման Անդրեասյանի մոտ կտրված է եղել աջ ականջը եւ կտրվածքներ են եղել կրծքավանդակի վրա, Ազատ Սիմոնյանի մոտ կտրված է եղել աջ ձեռքի մատը, Աշոտ Շահբազյանի ձախ աչքը հանված է եղել: Հետագայում այս գործերի հիման վրա իրավապաշտպան կազմակերպությունները դիմում կպատրաստեն եւ կուղարկեն ՄԻԵԴ:
Ազգային ժողովն այսօր վավերացրել է Ռուսաստանի հետ միավորված ՀՕՊ համակարգ ստեղծելու մասին համաձայնագիրը: Չնայած երկու օրերի բուռն քննադատությանը՝ համաձայնագրին դեմ քվեարկել է միայն 8 պատգամավոր: Ինչպես իշխանությունների համար կարեւոր բոլոր քվեարկությունների ժամանակ, այսօր էլ Հանրապետականները, այդ թվում նիստերին ավանդաբար չմասնակցող գործարար պատգամավորները, մեկ մարդու պես ներկայացան խորհրդարան եւ ապահովեցին համաձայնագրի վավերացումը:
Արտահերթ նստաշրջանին Կառավարության ներկայացրած բոլոր նախագծերը մեկը մյուսի հետեւից ընդունվեցին: Կոճակ սեղմելու մեխանիկական աշխատանքն ընդհատվեց միայն մեկ անգամ, երբ Գալուստ Սահակյանը Բավրան շփոթեց Բավարիայի հետ: 20 րոպեում նիստն ավարտվեց: Ազգային ժողովը գնաց արձակուրդ:
Չորսօրյա հանգստի սպասելիքները չարդարացան. Կառավարությունը խախտել է Տիգրան Սարգսյանի ձեւավորած ավանդույթն ու Վարդավառի տոնին հաջորդող երկուշաբթի օրվա Մեռելոցն այս անգամ ոչ աշխատանքային օր չի հայտարարել: Շատերը մեծ ուիքենդի հույսեր ունեին՝ շաբաթից երեքշբաթի, մինչդեռ ոչ աշխատանքային կլինի միայն հուլիսի 5-ը՝ Սահմանադրության օրը:
Ռուսաստանի ԱԻՆ-ի 4 օդանավերով արդեն Հայաստան է տեղափոխվել Լարսի անցակետում արգելափակված Հայաստանի մոտ 200 քաղաքացի: Ռուսաստանի իշխանությունները միայն 7 օր անց են կազմակերպել հայերի տեղափոխման հարցը: Մինչ ռուսական հեռուստաընկերությունները կադրեր էին ցուցադրում Լարսի անցակետում երգող- պարող հայերի եւ նրանց բաժանվող տաք սննդի մասին, «Զվարթնոց» օդանավակայանում NEWS.am-ի թղթակցին վերադարձածները պատմել են, որ իսկական դժոխքի միջով են անցել, առաջին օրերին կիսասոված են եղել, մինչեւ որ օգնության են հասել Վլադիկավկազի հայերը: Լարսն անանցանելի դարձրած փլուզման հետեւանքները դեռ չեն վերացվել: Վթարա- վերականգնողական աշխատանքները կարող են տեւել մինչեւ շաբաթ:
Տրանսպորտի եւ կապի նախարար Գագիկ Բեգլարյանը խորհուրդ է տալիս Yandex Taxi-ի սեփականատերերին պայմանագրեր կնքել լիցենզավորված վարորդների հետ, հակառակ դեպքում ընկերությունը կտուգանվի: Բեգլարյանը վստահեցրել է, որ օրենսդրորեն հավասար պայմաններ են ստեղծվելու բոլոր տաքսի ծառայություններ մատուցողների համար: Ընդ որում, նոր օրենքը վերաբերելու է նաեւ GG ընկերությանը, ինչպես նաեւ ինտերնետով աշխատող բոլոր տաքսիստներին: Հիշեցնենք, որ Yandex Taxi օնլայն ծառայությունը Հայաստանում կսկսի գործել հուլիսի 1-ից: Այն առաջարկել է 100 դրամ մինիմալ վճար առաջին երկու կիլոմետրի համար եւ կհամագործակցի տաքսի ծառայությունների հետ, բայց ոչ անհատ վարորդների: Ռուսաստանի 15 քաղաքներում աշխատող Yandex Taxi-ի մուտքը Հայաստան բողոքի ալիք է առաջացրել անհատ տաքսիստների շրջանում:
Դատարանը մերժել է Ավետիսյանների հարազատներին նյութական փոխհատուցում վճարելու հայցը, որը Գյումրիում սպանված ընտանիքի հարազատների փաստաբանները ներկայացրել էին Ռուսաստանի Դաշնությանը: Դատավոր Հարություն Մովսիսյանը 1 ամիս քննելուց հետո առանց հիմնավորման մերժել է հայցը, ինչը փաստաբանները համարում են օրենքի կոպիտ խախտում եւ պատրաստվում են ինքնաբացարկի միջնորդություն ներկայացնել դատավորին: Նշենք, որ փաստաբանները 50 հազար եվրո են պահանջում ընտանիքի յուրաքանչյուր չափահաս անդամի եւ 100 հազարական եվրո երեխաների՝ Հասմիկ եւ Սերյոժա Ավետիսյանների համար:
Բանակում հոգեկան խնդիրներ ձեռք բերած ժամկետային զինծառայող Արթուր Հակոբյանին ծեծի ենթարկելու գործը կարճվել է: Արթուրի հարազատներին Քննչական կոմիտեից հայտնել են, որ հանցախմբի բացակայության հիմքով է կարճվել գործը, ապացույցներ ձեռք չեն բերվել այն մասին, որ Արթուրին ծեծի է ենթարկել նրա գումարտակի հրամանատար Ջիվան Մկրտչյանը: Հարազատներն այս որոշումից դժգոհ են, նրանք պնդում են, որ Արթուրը լրիվ առողջ է գնացել բանակ եւ 10 ամիս անց վերադարձել հոգեկան խնդիրներով, վախեցած է, նոպայի մեջ ընկնելիս ամեն անգամ գումարտակի հրամանատարի անունն է տալիս: Նրանց տեղեկություններով, Արթուրին հրամանատարը ծեծել է հարբած վիճակում, ինչի հետեւանքով էլ առողջական խնդիրներ է ձեռք բերել:
Հունիսի 30-ն այս ամսվա ամենաշոգ օրն էր, գրանցվել է 38 աստիճան ջերմություն: Օդերեւութաբանական ծառայությունը հայտնում է, որ հուլիսի 1-ից Սեւ ծովից ներթափանցած ցիկլոնի ազդեցությամբ մինչեւ հուլիսի 5-ը ջերմաստիճանն օրենցօր կնվազի՝ հասնելով 33-ի: Սպասվում են տեղումներ: Հուլիսի 5-ից ջերմաստիճանը կմնա անփոփոխ, նորմայի սահմաններում:
Հուլիսի մեկին օդի ջերմաստիճանը մի փոքր կնվազի: Շրջանների մեծ մասում՝ այդ թվում մայրաքաղաքում հնարավոր է կարճատև անձրև: Առաջիկա գիշերը մայրաքաղաքում կլինի +19+21, իսկ վաղը ցերեկը՝ +35+36 աստիճան տաքություն։
Այսօր բոլոր հիմնական արտարժույթները ամրապնդվել են: Դոլարի փոխարժեքը կազմել է 476, ռուբլունը՝ 7.44, եվրոյինը՝ 530, իսկ ֆունտինը՝ 641 դրամ: