Էկոնոմիկայի նախարարության աշխատակազմի շուկայի վերահսկողության պետական տեսչության փաստաթղթաշրջանառության եւ իրավական համակարգման բաժնի պետ Արծրուն Նաջարյանը մեղադրվում է պաշտոնեական անփութության մեջ: Այս մասին NEWS.am-ը տեղեկացավ Դատական տեղեկատվական համակարգից:
Ըստ մեղադրական եզրակացության՝ Նաջարյանը 2010-2013թթ. ընթացքում դրսեւորել է հանցավոր անփութություն, թերի եւ ոչ պատշաճ է կատարել քաղաքացիական ծառայողի պաշտոնի անձնագրով սահմանված իր պարտականությունները, ինչի արդյունքում պետական բյուջե չի վերականգնվել 8 մլն 320 հազար դրամի չափով գումար եւ պետության օրինական շահերին պատճառվել է էական վնաս։
Էկոնոմիկայի նախարարության պաշտոնյային մեղադրանք է առաջադրվել Քրեական օրենսգրքի 315-րդ հոդվածի 1-ին մասով, որը պատժվում է տուգանքով՝ նվազագույն աշխատավարձի երեքհարյուրապատիկից հինգհարյուրապատիկի չափով, կամ կալանքով՝ առավելագույնը երկու ամիս ժամկետով: Նա ստորագրությամբ ազատ է արձակվել:
Գործը քննվում է մայրաքաղաքի դատարաններից մեկում: