Ճապոնիայի Գերագույն դատարանը հավանություն է տվել ստորին ատյանի դատարանի որոշմանը, որն օրինական էր համարել ոստիկանության կողմից երկրի մուսուլմանական համայնքին հետեւելը, գրում է The Independent-ը:
2010-ին տեղի է ունեցել ավելի քան 100 ոստիկանական թղթապանակների արտահոսք, որոնցում տվյալներ էին պարունակվում մուսուլմանների հետապնդումների մասին: Տեսագրություններն արվել էին Տոկիոյի աղոթավայրերում, հալալ խանութներում եւ իսլամական կազմակերպության գրասենյակներում: Ֆայլափոխանակման կայքերի միջոցով 20 երկրից ավելի քան 10 հազար օգտատեր տեղեկությունների զանգված էր ներբեռնել:
Դրանից հետո 17 մուսուլմաններից կազմված խումբը, որոնք հիմնականում Մերձավոր Արեւելքից եւ Հյուսիսային Աֆրիկայից էին, դատի էր տվել ճապոնական կառավարությանը իրենց սահմանադրական իրավունքները խախտելու համար:
Արդյունքում հայցվորները 880 հազար դոլարի չափով դրամական փոխհատուցում են ստացել իշխանությունների կողմից իրենց մասնավոր կյանք ներխուժման համար: Սակայն երկրի գերագույն դատարանը ոստիկանության գործողություններն «անհրաժեշտ եւ անխուսափելի» է համարել միջազգային ահաբեկչությունից պաշտպանության համար:
2010 թվականի տվյալներով, Ճապոնիայի մուսուլմանական համայնքը մոտ 185 հազար անդամ ուներ: Ներկայումս Ճապոնիայի տարբեր շրջաններում մոտ 40 մզկիթ է գործում եւ մոտավորապես 100 իսլամական աղոթավայր, հայտնում է lenta-ն:
